സംരംഭകത്വത്തിലെ അനുപമജേതാക്കൾ

'സ്വർണ്ണലോകം' എന്ന എക്സിബിഷൻ കാണാനിടയായതാണ്, 'ഒരു ഗ്രാം തങ്കത്തിൽ പൊതിഞ്ഞ ആഭരണങ്ങൾ നിർമ്മിക്കാൻ പ്രകാശ് പറക്കാട്ടിനും ഭാര്യ പ്രീതി പ്രകാശിനും പ്രേരണയായത്. പറക്കാട്ട് എന്ന ബ്രാൻഡിലൂടെ ഉപഭോക്താക്കൾക്ക് ഏറ്റവും മികച്ചത് മാത്രം നൽകിയിട്ടുള്ള വ്യവസായിയായ പ്രകാശ് പറക്കാട്ടിന്റെ നിർദ്ദേശപ്രകാരം, ബ്രാൻഡിന്റെ സത്യസന്ധത, ആധികാരികത, ഗുണമേന്മ എന്നിവ വെളിവാക്കുന്ന ഒരു എക്സ്ക്ലൂസീവ് ഓൺലൈൻ സ്റ്റോറും പ്രവർത്തിക്കുന്നുണ്ട്. 24 കാരറ്റ് തങ്കത്തിൽ പൊതിഞ്ഞതും ഒന്നിനൊന്ന് മികച്ചതുമായ ഡിസൈനിലുള്ള ആഭരണങ്ങൾ പ്രായഭേദമന്യേ എല്ലാ ആൾക്കാരെയും ആകർഷിക്കുന്നതരത്തിലുള്ളതാണ്. ഈ മികവാണ് അതിവേഗം വളരാനും വിപണി കൈയ്യടക്കാനും പറക്കാട്ടിനെ സഹായിച്ചത്.

- ഷീജാ നായർ

ചിന്തകളാണ് പ്രചോദനത്തിന്റെ ഉറവിടം. വിശാലമായി ചിന്തിച്ച് ജീവിതവിജയം കൈവരിക്കുകയെന്നത് അത്ര എളുപ്പമല്ല. ഇന്നത്തെ സമൂഹത്തിലെ ഭൂരിപക്ഷം ആൾക്കാരും സ്വന്തം ബിസിനസ്സ് ചെയ്ത് വിജയം കൈവരിക്കാൻ ആഗ്രഹിക്കുന്നവരാണ്. പലപ്പോഴും ബിസിനസ്സ് വിജയിപ്പിക്കാനുള്ള വിഭവങ്ങൾ ഇല്ലാത്തതിനാൽ പലർക്കും വിജയം അകലെയാണ്. എന്നിരുന്നാലും, എല്ലാവർക്കും ജീവിതത്തിൽ തുല്യ അവസരങ്ങളുണ്ട്. നിങ്ങൾ വിശ്വസിക്കുന്ന കാര്യങ്ങളിൽ ഉറച്ചു നിൽക്കുകയും ലക്ഷ്യത്തിലെത്തുന്നതു വരെ ആത്മാർത്ഥമായും പ്രവർത്തിക്കുകയും ചെയ്യുന്നതാണ് സംരംഭകത്വം. സാമ്പത്തികവും തൊഴിൽപരവുമായ ഉദ്ദേശ്യങ്ങൾക്കായി സംരംഭകർ സ്ഥാപനങ്ങൾ രൂപീകരിക്കുകയെന്നത് മാത്രമല്ല അഭിലാഷങ്ങൾ നിറവേറ്റുന്നതിനായി ഉയർന്ന ലക്ഷ്യങ്ങൾ ഉന്നം വയ്ക്കുക വേണം. ഇത്തരത്തിൽ വ്യക്തമായ കാഴ്ചപ്പാടോടുകൂടിയും പ്രവർത്തനപദ്ധതിയോടു കൂടിയും ശ്രദ്ധാ പൂർവ്വമായ ആസൂത്രണത്തിൽക്കൂടിയും ആരംഭിച്ച സംരംഭം സമ്പൂർണ്ണ വിജത്തിലെത്തിച്ച സംരംഭകൻ പ്രകാശ് പറക്കാട്ടിന്റെ വിജയഗാഥയിലേക്കുള്ള പ്രയാണം എളുപ്പമായിരുന്നില്ല. ഒരു എക്സിബിഷൻ സന്ദർശന വേളയിൽ കിട്ടിയ ആശയത്തിൽ നിന്നാണ് പറക്കാട്ട് ജ്വല്ലറി എന്ന ഒരു ഗ്രാം തങ്കത്തിൽ പൊതിഞ്ഞ ആഭരണങ്ങളുടെ ഷോറൂമുകളുടെ തുടക്കം. അത് ധീരമായ ചുവടുവെയ്പ്പായിരുന്നു. പറക്കാട്ട് ഗ്രൂപ്പ് ഓഫ് കമ്പനീസ് ഒരു ജ്വല്ലറി സ്ഥാപനം തുടങ്ങാൻ വിഭാവനം ചെയ്യുമ്പോൾ തന്നെ ചെയർമാൻ പ്രകാശ് പറക്കാട്ട് അതിനെക്കുറിച്ച് സമഗ്രമായ അന്വേഷണത്തിനും വിശകലനത്തിനും പ്രത്യേക ഊന്നൽ നൽകിയിരുന്നു. 1990-ൽ ശ്രീ മൂലനഗരത്തിലും കാലടിയിലും രണ്ട് ഷോറൂമുകൾ തുറന്ന് ഈ വ്യവസായത്തിലേക്ക് പ്രവേശിച്ചത് ആഭരണമേഖലയിൽ പുത്തൻ താരോദയത്തിന്റെ അടിസ്ഥാനമായിരുന്നു.