അനന്തപുരിയുടെ വിസ്മയിപ്പിക്കുന്ന കാഴ്ചകളും ശ്രീ പത്മനാഭസ്വാമി ക്ഷേത്രദർശനവും

കുതിരമാളികയ്ക്ക് മുകളിൽ സ്ഥാപിച്ചിരിക്കുന്ന ക്ലോക്കാണ് മറ്റൊരാകർഷണം. അന്നത്തെ യാത്രയിൽ കുട്ടികളായ ഞങ്ങളെ ഏറെ ആകർഷിച്ചതും ഈ ഘടികാരമാണ്. ഇതിനെ മേത്തൻമണി എന്നാണ് പറയുന്നത്. ഓരോ മണിക്കൂറിലും ഇടവിട്ട് ബെല്ലടിച്ചിരുന്ന ക്ലോക്കിന് മുകളിൽ ഒരു മനഷ്യന്റെ മുഖമുണ്ട്, ബെല്ലടിക്കുമ്പോൾ അതിന്റെ വായ തുറന്ന് വരും.

- ഡോ. പി. കെ. ജയകുമാരി

തിരുവനന്തപുരത്തെ യാത്രകളിൽ മനസ്സിനെ ആകർഷി ച്ച ഒന്നാണ്, ശ്രീ പത്മനാഭസ്വാമി ക്ഷേത്രം. തിരുവനന്തപുരം എന്ന വാക്കിന്റെ അർത്ഥം തന്നെ തിരു അനന്തന്റെ പുരം അല്ലെങ്കിൽ അനന്തൻ പാർക്കുന്ന ഇടം എന്നാണ്. അനന്തൻ എന്നാൽ അന്തമില്ലാത്തവൻ എന്നാണ്. ക്ഷേത്രത്തിന്റെ കിഴക്കേനടയിലാണ് പുത്തൻ മാളിക അല്ലെങ്കിൽ കുതിര മാളിക സ്ഥിതിചെയ്യുന്നത്. കേരളത്തിന്റെ സാംസ്ക്കാരികത്തനിമയും വാസ്തുവിദ്യയും നിറഞ്ഞുനില്ക്കുന്ന കെട്ടിടം പണികഴിപ്പിച്ചിരിക്കുന്നത് തടിയിലാണ്. അമൂല്യമായ മരത്തടികളിലെ കൊത്തുപണികളും ശില്പ്പങ്ങളും ചുവർചിത്രങ്ങളും എണ്ണച്ഛായാ ചിത്രങ്ങളും ഇവിടെ സംരക്ഷിച്ച് വരുന്നു.

കുതിര മാളികയ്ക്ക് മുകളിൽ സ്ഥാപിച്ചിരിക്കുന്ന ക്ലോക്കാണ് മറ്റൊരാകർഷണം. അന്നത്തെ യാത്രയിൽ കുട്ടികളായ ഞങ്ങളെ ഏറെ ആകർഷിച്ചതും ഈ ഘടികാരമാണ്. ഇതിനെ മേത്തൻമണി എന്നാണ് പറയുന്നത്. ഓരോ മണിക്കൂറിലും ഇടവിട്ട് ബെല്ലടിച്ചിരുന്ന ക്ലോക്കിന് മുകളിൽ ഒരു മനഷ്യന്റെ മുഖമുണ്ട്, ബെല്ലടിക്കുമ്പോൾ അതിന്റെ വായ തുറന്ന് വരും. അപ്പോൾ കവിളിന് ഇരുഭാഗത്തും സ്ഥാപിച്ചി ട്ടുള്ള ചെറിയ ആടുകളുടെ രൂപങ്ങൾ  കവിളിലേക്ക് ആഞ്ഞിടിക്കുകയും അതിന്റെ വായ അടപ്പിക്കുകയും ചെയ്യും. ഇത് കാണുവാൻ നിരവധി സന്ദർശകർ കുട്ടികളെയും കൊണ്ട് അവിടെ എത്താറുണ്ട്. മുതിർന്നവരേയും കുട്ടികളേയും ആകർഷിച്ചിരുന്ന ഈ ക്ലോക്ക് കുട്ടികൾക്കതൊരു പ്രത്യേകരസം തന്നെ നല്കിയിരുന്നു.

ഇതെഴുതിയപ്പോൾ ജർമ്മിനിയിലെ ബ്ലാക്ക് ഫോറസ്റ്റിനടുത്ത് കുക്കൂ ക്ലോക്ക് സ്റ്റോറും സന്ദർശിച്ചതും അതിന്റെ മേൽകൂരയിൽ സ്ഥാപിച്ചിരിക്കുന്ന മനോഹരമായ ക്ലോക്കും വൈകുന്നേരങ്ങളിൽ കൃത്യം നാല് മണിക്ക് ബെല്ലടിക്കുമ്പോൾ സുന്ദരനായ പൂവൻ കോഴിക്ക് പിന്നാലെ നഗരവാസികളും മൃഗങ്ങളും പക്ഷികളും ഗാനത്തിനൊപ്പം താളലയത്തോടെ നൃത്തം ചെയ്ത് പോവുന്ന കണക്കേ വളരെ കലാബോധത്തോടെ ഒരുക്കിയിട്ടുള്ള കാഴ്ച വീക്ഷിക്കുവാൻ പ്രായഭേദമെന്യേ സന്ദർശകർ ഓടി കൂടി അതിന് മുന്നിൽ നിന്ന് പാവകളോടൊപ്പം നൃത്തം ചെയ്തതും ഓർത്ത് പോയി.