സുന്ദരം, ഡിസൈൻ പഠനം

അനന്തസാധ്യതകളുള്ള പഠനമേഖലയായി വളരുന്ന ശാഖയാണിത്

- ബി.എസ്.വാരിയർ

സൗന്ദര്യബോധം ആധുനിക ജീവിതത്തിന്റെ മുഖമുദ്രയായിത്തീർന്നിട്ടുണ്ട്. ഏതു വസ്തുവും ആവശ്യം നിർവഹിച്ചാൽ മാത്രം പോരാ, ഹൃദയഹാരിയായ രൂപലാവണ്യവും ആവാഹിക്കണമെന്ന ചിന്തയുള്ളവർ ഏറിയ പശ്ചാത്തലത്തിൽ, അനന്തസാധ്യതയുള്ള പഠനമേഖലയായി രൂപകൽപന വളർന്നിരിക്കുന്നു. ദേശീയ ഡിസൈൻ സ്ഥാപനങ്ങളിൽ ഗണ്യമായ മലയാളി സാന്നിധ്യമുണ്ട്.

ചിത്രരചന മാത്രം കൈമുതൽ പോരാ

 ഡിസൈൻ എന്നു പറയുന്നതു കേവലം ഫാഷൻ ഡിസൈനല്ല. വീട്ടിലെ ചായക്കപ്പും സണും മുതൽ കണ്ണട ഫ്രെയിമും ടിവിയുംവരെ മനോഹരമായിരിക്കണമെന്ന് നമ്മുടെ സൗന്ദര്യബോധം ആവശ്യപ്പെടുന്നു. വസ്ത്രത്തിന്റെ കാര്യത്തിൽ ഇത് ഏറെ പ്രകടമാണ്. മോട്ടർ ബൈക്കും കാറും കപ്പലും മറ്റും നിർമിക്കുമ്പോഴും ഉപയോഗമെന്നതുപോലെ ആകർഷകരൂപവും പരിഗണിക്കാറുണ്ട്.