சுற்றுச்சூழல் குற்றமும் கொடிய குற்றமே!

ஒவ்வோர் ஆண்டும் ஜூன் 5 அன்று பெரும்பாலான ஊடகங்களில் ஒளி, ஒலியுமாக நமக்குக் கடத்தப்படும் செய்தி 'சுற்றுச்சூழல் பாதுகாப்பு' பற்றியதே! ஐக்கிய நாடுகளின் பொது அவை, ஜூன் ஐந்தாம் தேதியை உலக சுற்றுச்சூழல் தினமாக 1972 ஸ்டாக்ஹோம் மாநாட்டில் அறிவித்தது.

- அ. சங்கர் பிரகாஷ்

சுற்றுச்சூழல் பாதுகாப்பு குறித்த பரவலான உரையாடல் மேற்சொன்ன நாளில் மட்டுமே அதிகம் நடப்பதால், சுற்றுச்சூழல் குற்றங்கள் குறித்தும், அக்குற்றங்களுக்கும் பேரிடர்களுக்கும் இருக்கும் தொடர்புகள் பற்றியுமான விவாதங்கள் மிகக்குறைவே. எது சுற்றுச்சூழல் குற்றம்?

எளிமையாகச் சொல்லவேண்டும் என்றால் சட்டத்திற்குப் புறம்பான ஏதேனும் ஒரு செயல், நேரடியாக சுற்றுச்சூழலுக்கு பாதிப்பை ஏற்படுத்துமாயின், அதுவே சுற்றுச்சூழல் குற்றம் என வரையறுக்கப்படுகிறது. அதே வேளையில், விளக்கமான வரையறை என்பது எந்தவொரு மனித செயலானது உள்நோக்கத்துடன், அறிந்து, அச்செயலின் விளைவுகள்பற்றி கவலைப்படாமல் அல்லது கட்டுப்பாடுகளை புறக்கணித்து, சுற்றுச்சூழல் சம்பந்தப்பட்ட சட்டங்களையும், விதிமுறைகளையும் மீறுவதாக இருக்கிறதோ அதுவே சுற்றுச்சூழல் குற்றமாக கருதப்படும்.