வசந்த விழா

மதிப்பனூர் வண்டிக்காக திருமங்கலம் பஸ் ஸ்டாண்டில் வெகுநேரமாய் காத்துக்கிடக்கிற பாண்டியம்மாளுக்கு அச்சலத்தியாய் இருந்தது.

- ஸ்ரீதர் பாரதி

பழைய பட்டுப்புடவை, கழுத்தில் கவரிங் செயின், ஒடிந்து விடுகிற மாதிரி உடம்பு. பேருந்துகளை வெறித்துக் கிடந்தவளுக்கு நாக்கு வறண்டுவிட்டது.

டீக்கடையில் தண்ணீர் குடிக்க லாமென்று நகர்ந்தவளை ஏறு வெயில் ஏளனம் செய்தது. நெற்றி வியர்வையில் திருநீறும் அழிந்தது.

அண்ணன் வீட்டு விசேஷம், தவிர்க்க முடியாது. போகாமல் இருந்தால் செத்ததுக்கு சமம். கூடப் பொறந்த பொறப்பு. அஞ்சு வருசமாவே அண்ணன் மச்சக் காளை வீட்டுக்கும் தங்கச்சி பாண்டியம்மாள் வீட்டுக்கும் அன்னம் தண்ணி புழக்கமில்லை.

ஆத்தா செத்த எழவுல வந்த ஏழரையால் பேச்சு வார்த்தை இல்லாமல் போய்விட்டது. அண்ணன்தான் பத்திரிகை வைத்துவிட்டுப் போனான். அவன் ஒரு வெகுளி.

மதனிதான் மந்தாரை.