மைதானத்தில் நடந்த 8 ஆண்டுக்கால சண்டை!

ஆமாம். ஸ்கூல் ஸ்டூடண்ட்ஸ் கிரவுண்டில் அடித்துக் கொள்வார்கள் இல்லையா..? அப்படி இந்திய அணியின் இரு கிரிக்கெட் வீரர்கள் ஐபிஎல் மைதானத்தில் சண்டையிட்டதுதான் இன்று ஹாட் டாபிக். இது இந்திய கிரிக்கெட் அணியில் புகைந்து கொண்டிருக்கும் ‘உள் அரசியலை’ வெளிச்சமிட்டுக் காட்டியிருக்கிறது.

- ஜான்சி

ஒன்றும் புரியவில்லையா..? சரி, விளக்கமாகவே பார்த்து விடுவோம்.

ஐபிஎல் போட்டிகள் நடைபெற்றன அல்லவா..? அப்போது ஆர்சிபி. என்று செல்லமாக அழைக்கப்படும் ராயல் சேலஞ்சர்ஸ்க்கும் லக்னோ சூப்பர் ஜெயண்ட்ஸ் அணிக்கும் லக்னோ மைதானத்தில் ஐபிஎல் போட்டி நடந்தது.குறைந்த ரன்களே எடுக்கப்பட்ட அந்தப் போட்டியில் ஆர்சிபி வெற்றி பெற்றது.ஆனால், அதுவும் செய்தி அல்ல.விராத் கோலியும் கவுதம் கம்பீரும் கட்டி உருளாத குறையாக சண்டை போட்டார்கள் பாருங்கள்... அதுதான் ஹாட் ஹெட்லைன்! யெஸ். கிட்டத்தட்ட கைகலப்புதான். அருகிலிருந்த மற்ற ஆட்டக்காரர்கள் தடுக்காவிட்டால் இருவரும் பள்ளி மாணவர்கள் போல் மைதானத்தில் கட்டிப் புரண்டு சண்டை போட்டிருப்பார்கள்.

இந்தியாவின் இரண்டு மூத்த, முக்கியமான வீரர்கள் மைதானத்தில் இதுபோன்று ஆக்ரோஷமாக மோதிக் கொண்டது உலக தொலைக்காட்சி வரலாற்றிலேயே இதுதான் முதல் முறை.

என்ன நடந்தது?

போட்டியில் முதலில் ஆடிய ஆர்சிபி அணி 20 ஓவர்களில் 126 ரன்கள் எடுத்தது. அடுத்து லக்னோ அணி பேட்டிங் செய்ய வந்தது.  குறைந்த ரன்கள்தானே, எளிதில் எடுத்துவிடலாம் என்று ஆட வந்த லக்னோவுக்கு அடித்து ஆட முடியவில்லை. 108 ரன்கள் மட்டுமே அடித்து தோற்றுப் போனது.