2 வருடங்கள்...300 உடைகள்...

பாலிவுட் பிரம்மாண்ட இயக்குநரான சஞ்சய் லீலா பன்சாலியின் இயக்கத்தில் ஓடிடியில் வெளியாகியிருக்கிறது ‘ஹீராமண்டி: த டைமண்ட் பஜார்’ வெப் சீரிஸ்.

1940களில் - இந்திய சுதந்திரத்திற்கு முந்தைய காலம், குறிப்பாக இந்தியா, பாகிஸ்தான் ஒன்றாக இருந்த வேளை... இந்திய நவாப்கள் அவர்களுக்காகவே உருவாக்கிய விலை மாதர்களின் சந்தை என்றும் ஹீராமண்டியைச் சொல்லலாம்.

நடன பார்கள், கலை அரங்கங்கள், மது, மாது என எந்நேரமும் சீமாட்டிகளின் அழகில் ஜொலித்துக் கொண்டிருந்த சிவப்பு விளக்குப் பகுதி. லாகூரின் முக்கியத்துவம் வாய்ந்த இந்த இடத்தையும் வரலாற்றையும் இந்தியா அவ்வளவு சுலபமாக மறக்காது. இந்த வரலாற்று உண்மைகளை மையமாகக் கொண்டு உருவாக்கப்பட்டிருக்கிறது ‘ ஹீராமண்டி: த டைமண்ட் பஜார்’.

சஞ்சய் லீலா பன்சாலியின் உருவாக்கம் என்றாலே அங்கே பிரம்மாண்டத்திற்கும் வண்ணமயமான உடைகளுக்கும் பஞ்சம் இருக்காது. இந்த வெப் சீரிஸும் சோடை போகவில்லை. சுமார் ரூ.200 கோடி பட்ஜெட்டில் உருவாக்கப்பட்டிருக்கும் இந்தியாவின் முதல் வெப் சீரிஸ் என்னும் பெருமையையும் பெற்றிருக்கிறது.

இந்த வெப் சீரிஸ்க்காக இரண்டு வருடங்கள் மற்றும் 300 உடைகள் என்னும் சவாலை சந்தித்திருக்கிறார்கள் பிரபல ஆடை வடிவமைப்பாளர்களான ரிம்பிள் மற்றும் ஹர்பிரீத் நருலா தம்பதி.

ரியல் ரெடிமேட் கடைகள் முதல் இன்ஸ்டா ரீல்ஸ் வரை எங்கும் ட்ரெண்டிங்கில் இருக்கும் இந்த உடைகளின் வரலாற்றை முகம் மலர சொல்லத் தொடங்கினார்கள்.‘‘சின்ன வயதில் இருந்து நாங்க குடும்ப நண்பர்கள்...’’ லேடீஸ் ஃபர்ஸ்ட் என்பதற்கிணங்க பேசத் தொடங்கினார் ரிம்பிள் நருலா.

‘‘ரெண்டு பேருக்குமே ஃபேஷன் சார்ந்த ஆர்வம் அதிகம். சேர்ந்தே தில்லியில் ஹன்ஸ்ராஜ் கல்லூரியில் ஃபேஷன் டிசைனிங் படிச்சு முடிச்சோம். அப்போதே உடைகள் மற்றும் ஆடை வடிவமைப்புக்காக ஊர் ஊராக சுற்றித் திரிவதுண்டு. கரியருக்காக எங்களுடைய ரெண்டு மூளை இணையத் தொடங்கி தொடர்ந்து இதயமும் ஒன்று சேர்ந்திடுச்சு. 1999ல் வீட்டார் சம்மதத்துடன் ரெண்டு பேரும் திருமணம் செய்துகிட்டோம்.  

துவக்கத்தில் நண்பர்கள், உறவினர்கள்னு உடைகள் டிசைனிங் செய்துகிட்டு இருந்தோம். தொடர்ந்து ஹர்பிரீத் ஒரு சின்ன பொட்டிக் டிசைனிங் ஷோரூமை லூதியானாவில் ஆரம்பித்து பிசினஸைத் துவங்கினார். பின்னர்தான் எங்களின் பிசினஸை தில்லிக்கு மாற்றினோம்.