தெலங்கானாவின் முதல் அவகேடோ விவசாயி!

உலகம் முழுவதும் அதிகமாக விற்பனையாகும் வெப்ப மண்டல பழங்களில் இரண்டாவது இடத்தில் இருக்கும் பழம், அவகேடோ.

நிறைய மருத்துவக் குணங்களையும், ஏராளமான ஊட்டச்சத்துகளையும் கொண்ட பழம் இது.

குறிப்பிட்ட சில நாடுகளில் மட்டுமே விளைவிக்கப்பட்டு, உலகம் முழுவதும் விநியோகிக்கப்படுகிறது. இதன் தேவை அதிகமாக இருப்பதால் விலையும் அதிகம். நம்ம ஊரில் இதனை பட்டர் ஃப்ரூட் என்று அழைக்கின்றனர். காரணம், பெரும்பாலான வேகன் பேக்கரிகளில் வெண்ணெய்க்குப் பதிலாக அவகேடோவைப் பயன்படுத்துகின்றனர்.

மட்டுமல்ல, சுமார் 10 ஆயிரம் வருடங்களுக்கு முன்பே மெக்சிகோவில் அவகேடோ விவசாயம் செய்யப்பட்டதாக வரலாற்று ஆய்வுகள் சொல்கின்றன. பத்தொன்பதாம் நூற்றாண்டு வரைக்கும் தென் அமெரிக்க நாடுகள், இஸ்ரேலில் மட்டும் பிரத்யேகமாக விளையக்கூடிய ஒரு பழமாக இருந்து வந்தது, அவகேடோ. 100 வருடங்களுக்கு முன்புதான் இந்தியா போன்ற நாடுகளில் அவகேடோ விவசாயம் கால்பதித்தது. பொதுவாக வெப்பநிலை 20 முதல் 30 டிகிரி செல்சியஸுக்குள் உள்ள பகுதிகளில் மட்டுமே விளையக்கூடிய ஒரு பழம் இது.

இந்தியாவின் வடகிழக்கு மாநிலங்கள், கர்நாடகா, தமிழ்நாடு, கேரளாவில் உள்ள குறிப்பிட்ட சில இடங்களில் மட்டுமே விளைகிறது. இந்நிலையில் வெப்பநிலை அதிகமுள்ள தெலங்கானாவில் அவகேடோ விவசாயம் செய்து வருகிறார் ஜெய்ப்பால் நாய்க். தெலங்கானாவின் முதல் அவகேடோ விவசாயியும் இவரே. ஹைதராபாத்திலிருந்து 40 கிலோமீட்டர் தொலைவில் உள்ள ஒரு கிராமம், தெப்படகுடா. இந்தக் கிராமத்தில் பிறந்து, வளர்ந்தவர், ஜெய்ப்பால் நாய்க்.

பள்ளிப்படிப்பை தெலுங்கு வழியில் படித்தார். சிறு வயதிலிருந்தே எல்லோருக்கும் தெரிந்த பெரிய ஆளாக வேண்டும் என்பது அவரது கனவு. ஓரளவுக்கு நல்ல வசதியான குடும்பத்தில் பிறந்ததால் ஜெய்ப்பாலின் விருப்பங்களுக்கு எந்த தடையும் வீட்டில் இல்லை. இந்தியாவில் எஞ்சினியர் படிப்பை முடித்துவிட்டு, மேற்படிப்பை வெளிநாட்டுக்குச் சென்று படித்தால் ஊரில் நல்ல மரியாதையும், புகழும் கிடைக்கும் என்று நினைத்தார் ஜெய்ப்பால்.