இளையராஜா பாடல்கள் காப்புரிமை... என்னதான் பிரச்னை?

‘தயாரிப்பாளர்களுடன் எந்த ஒப்பந்தமும் செய்துகொள்ளாத இசையமைப்பாளர் இளையராஜா, தான் இசையமைத்த 4 ஆயிரத்து 500 பாடல்களுக்கு எந்த உரிமையும் கோரமுடியாது...'

- பேராச்சி கண்ணன்

சமீபத்தில் ‘எக்கோ’ இசை நிறுவனம், இளையராஜா இசையமைத்த 4 ஆயிரத்து 500 பாடல்களைப் பயன்படுத்த தங்களுக்கு உரிமை உள்ளதாகக்கூறி சென்னை உயர்நீதிமன்றத்தில் மேல்முறையீட்டு மனு தாக்கல் செய்திருந்தது. அதில்தான் மேற்சொன்ன வாதத்தை முன்வைத்துள்ளது.

இளையராஜாவும் காப்பிரைட்ஸ் பிரச்னையும் கடந்த பதினைந்து ஆண்டுகளாக ஓயாமல் இடியாப்ப சிக்கலாகவே இருக்கிறது. இசையமைப்பாளர்கள் உருவாக்கும் இசை யாருக்குச் சொந்தம் என்கிற பிரச்னை இசையமைப்பாளர்களுக்கும், இசை நிறுவனங்களுக்கும் இடையில் தொடர்ந்து நீடித்து வருகிறது.

கடந்த 2010ம் ஆண்டு இளையராஜா சென்னை போலீஸ் கமிஷனரைச் சந்தித்து ‘எக்கோ’ நிறுவனத்தின் மீது ஒரு புகார் அளித்தார். அதில், தனது பாடல்கள் அனைத்தையும் சி.டி.யாக வெளியிடும் உரிமையை ‘எக்கோ’ ரிக்கார்டிங் நிறுவனத்துக்கு கொடுத்ததாகவும், இது சம்பந்தமாக ஒப்பந்தம் போடப்பட்டதாகவும், குறிப்பிட்ட பங்குத் தொகையைத் தர அந்த நிறுவனம் ஒப்புக்கொண்டதாகவும் கூறியிருந்தார்.

ஆனால், ஒப்பந்தப்படி கடந்த 20 வருடங்களாக பங்குத் தொகை எதுவும் தரவில்லை என்றும், பாடல் மூலம் பல கோடி ரூபாய் சம்பாதித்து மோசடி செய்துள்ளதாகவும் அந்த மனுவில் குறிப்பிட்டிருந்தார்.

இந்தப் புகார் குறித்து மத்திய குற்றப்பிரிவு போலீசார் வழக்கு பதிவு செய்து ‘எக்கோ’ நிறுவனத்திடமிருந்து 20 ஆயிரம் சிடிகளை அப்போது பறிமுதல் செய்தனர்.

இந்நிலையில் இளையராஜாவின் புகாரில் பதிவான வழக்குகளை ரத்து செய்யக்கோரி ‘எக்கோ’ நிறுவனம் சென்னை உயர்நீதிமன்றத்தில் வழக்கு தொடுத்தது. பின்னர் 2018ம் ஆண்டு இது ஒரு சிவில் பிரச்னை என்பதால் குற்றவியல் புகார் அளிக்க முடியாது எனக் கூறி இந்த வழக்கை ரத்து செய்து உயர்நீதிமன்றம் உத்தரவிட்டது.

இதுஒருபுறம் இருக்க 2014ம் ஆண்டு ‘எக்கோ’ உள்ளிட்ட சில இசை நிறுவனங்கள் மீது, ஒப்பந்தம் முடிந்த பிறகும் காப்புரிமை இல்லாமல் தனது பாடல்களை பயன்படுத்தியதாக சென்னை உயர்நீதிமன்றத்தில் இளையராஜா வழக்கு தொடர்ந்தார்.

இந்த வழக்கில் 2019ஆம் ஆண்டு தீர்ப்பு வழங்கப்பட்டது. அதில், தயாரிப்பாளரிடம் உரிமை பெற்று பாடல்களைப் பயன்படுத்த இசை நிறுவனங்களுக்கு உரிமை உள்ளது. இளையராஜாவுக்கும் இந்தப் பாடல்கள் மீது தனிப்பட்ட தார்மீக உரிமை இருக்கிறது எனத் தனி நீதிபதி உத்தரவு பிறப்பித்தார்.