மணிரத்னம் என்னைப் பாராட்டவே இல்லை..

‘பொன்னியின் செல்வன்’ பூங்குழலி கதாபாத்திரத்தை அவ்வளவு எளிதில் யாரும் மறந்திருக்கமாட்டார்கள். அகமும் முகமும் மகிழ்ச்சி கொப்பளிக்க அதில் நடித்தவர் ஐஸ்வர்யா லட்சுமி.

-  எஸ்.ராஜா

‘கட்டா குஸ்தி’யில் கீர்த்தி கதாபாத்திரம் இவருடைய இன்னொரு முகத்தை காண்பித்தது. இப்போது மணிரத்னம் இயக்கத்தில் கமலுடன் ‘தக் லைஃப்’ செய்கிறார். தீபாவளி வெடிச் சத்தம் அடங்கிய நிலையில் ஐஸ்வர்யா லட்சுமியிடம் பேசினோம்.

தொடர்ந்து வெற்றிக்கொடி பறக்க விடுகிறீர்களே..?

பெரிய சூத்திரமெல்லாம் கிடையாது. என்னைப் பொறுத்தவரை ஒரு படத்தை செலக்ட் பண்ண ரொம்ப டைம் எடுத்துக்க மாட்டேன். எப்படியென்றால், கதை கேட்கும்போது எனக்கு சில கேள்விகள் இருக்கும். 

அதற்கு திருப்திகரமான பதில் வரும்போது உடனே ஓகே சொல்லிடுவேன்.இந்தப் படத்தை ஓடிடியில் பார்க்க முடியுமா, என்னுடைய கதாபாத்திரம் கதையை நகர்த்த உதவுமா, என்னுடைய கதாபாத்திரத்துக்கான முக்கியத்துவம் குறைக்கப்பட்டாலும் படம் மக்கள் மத்தியில் சென்றடையுமா என்றெல்லாம் யோசிச்ச பிறகுதான் படங்களை கமிட் செய்கிறேன்.

தெலுங்கில் ‘அம்மு’ என்ற படம் செய்யும்போது எல்லோரும் ‘அது அழுத்தமான கதை. தெலுங்கில் இப்போதுதான் அறிமுகமாகிறீர்கள். உங்களால் அழுத்தமான கதை பண்ண முடியுமா’ என்று சந்தேகத்துடன் கேட்டார்கள். ஆனால், எனக்கு அந்தக் கதை ஒர்க்கவுட் ஆகும் என்ற நம்பிக்கை இருந்துச்சு. துணிச்சலோடுதான் அந்தக் கதையை செலக்ட் பண்ணினேன். படம் பெரிய வெற்றி. சவால்கள் இல்லையென்றால் வாழ்க்கை போரடித்துவிடும்.

காமெடி ரோலில் பின்னியெடுக்கிறீர்களே?

என்னுடைய நட்பு வட்டாரத்தில் நான்தான் கொஞ்சம் ஓவரா கலாட்டா பண்ணுவேன். என்னுடைய உண்மையான முகத்தை நீங்கள் இன்னும் திரையில் பார்க்கவில்லை. டிவி பேட்டிகளில் கூட சபை நாகரீகம் கருதி என்னை கன்ட்ரோல் செய்துகொண்டுதான் பேசுகிறேன்.

மலையாளத்தில் நீங்கள் வெற்றிகரமான நடிகை. தமிழில் அதை எப்படிப் பார்க்கிறீர்கள்?

சினிமாவுக்கு வந்த சமயத்தில் சராசரி நடிகையாக, கிடைச்ச வாய்ப்பை நழுவ விடாமல் படங்களை கமிட் செய்த காலம் உண்டு. அந்தப் படங்களில் எனக்கான முக்கியத்துவம் குறைவாகவே இருந்துச்சு. அந்த சமயங்களில் எனக்கு இரண்டு வாய்ப்புகள் மட்டுமே இருந்துச்சு. ஒண்ணு, வந்த வாய்ப்பை பண்ணணும்.