മേശപ്പൊരുത്തം

കഥക്കൂട്ട്

- തോമസ് ജേക്കബ്

എഴുത്തുമേശകളുടെ കാര്യത്തിൽ ഒരു സർദാർ തന്നെയായിരുന്നു കെ.എം.പണിക്കർ. നാലു മുറികളിലായി നാല് എഴുത്തുമേശകളുണ്ടായിരുന്നു അദ്ദേഹത്തിന് എന്ന് ഐ.കെ.കെ.മേനോൻ പറയുന്നു.

ഓരോതരം രചനയ്ക്കും ഓരോ മേശ എന്നതായിരുന്നു വകുപ്പുവിഭജനം. ഒന്നാമത്തെ മേശ മലയാളത്തിനുള്ളതാണ്. രണ്ടാമത്തേത് ഇംഗ്ലിഷിന്. മൂന്നാമത്തേത് ചരിത്ര പുസ്തകങ്ങൾക്ക്. നാലാമത്തേത് പ്രസംഗങ്ങൾക്കു കുറിപ്പു തയാറാക്കാൻ.

ലളിതാംബിക അന്തർജനത്തിന് സ്ഥിരമായ എഴുത്തുമേശ ഉണ്ടായിരുന്നില്ല. പുസ്തകം ശേഖരിച്ചു വയ്ക്കാനും വായിക്കാനും ഉപയോഗിക്കുന്ന മുറിയിൽ ചെറിയൊരു എഴുത്തുമേശ ഉണ്ടായിരുന്നു. ഒരു എഴുത്തുപലകയും. കിടന്നെഴുതാത്തപ്പോഴും നിലത്ത് കുത്തിയിരുന്ന് എഴുതാത്തപ്പൊഴും ഇവിടെയിരുന്നായിരുന്നു എഴുത്ത്.

വയലാർ രാമവർമ കുടുംബമായി എവിടെപ്പോയാലും താമസിക്കാൻ രണ്ടു മുറിയെടുക്കും. അദ്ദേഹത്തിന്റെ മുറിയിൽ ആർക്കും പ്രവേശനമില്ല. ഏറ്റവും അടുപ്പമുള്ള അമ്മയ്ക്കുപോലും. എഴുതുമ്പോൾ ചെറിയ ശബ്ദങ്ങൾപോലും അദ്ദേഹം സഹിക്കുമായിരുന്നില്ല. അടുത്തു മറ്റൊരാളുണ്ടാകുന്നതും.

സ്വകാര്യത കിട്ടാൻ വേണ്ടി കിടപ്പുമുറി പുറത്തുനിന്നു പൂട്ടി അകത്തിരുന്ന് എഴുതുമായിരുന്നു വൈക്കം മുഹമ്മദ് ബഷീർ.