നെഗറ്റീവ് ഇഷ്ടപ്പെടുന്ന സമൂഹം സാജു നവോദയ

എറണാകുളം ഉദയംപേരൂർ ആണ് കുടുംബം

- എം.കെ. ഷജിൻ

അടുത്തിടെയായി ബോധപൂർവ്വം കോമഡി പ്രാധാന്യമുള്ള കഥാപാത്രങ്ങൾ ചെയ്യുന്നതിൽ നിന്നും മാറി സീരിയസ് കഥാപാത്രങ്ങൾ ചെയ്യുന്നു. അത് മാറ്റം ഉണ്ടാക്കിയതാണോ?

ബോധപൂർവ്വമല്ല എന്നാൽ എനിക്ക് അത്തരം കഥാപാത്രങ്ങൾ ചെയ്യാൻ താൽപ്പര്യം ഉണ്ടായിരുന്നു. സ്കൂൾ കോളേജ് തലങ്ങളിൽ പഠി ക്കുമ്പോഴും ഞാൻ സീരിയസ് കഥാപാത്രം ചെയ്തുകൊണ്ടിരുന്നു. അമച്വർ നാടകം പഠിപ്പിച്ചുകൊണ്ടിരുന്നു. ഇപ്പോൾ വന്നുകൊണ്ടിരിക്കുന്നത് അത്തരം കഥാപാത്രങ്ങളാണ്. ഇക്കാക്ക എന്ന ചിത്രത്തിൽ അത്തരം കഥാപാത്രമാണ് ചെയ്തിരിക്കുന്നത്. സൈനു ചാവക്കാട് സംവിധാനം ചെയ്ത രണ്ടാമത്തെ ചിത്രമായ ആരോട് പറയാൻ ആര് കേൾക്കാൻ എന്ന ചിത്രത്തിൽ നിഷ്കളങ്കനായ ചെറുപ്പക്കാരൻ ആയിട്ടാണ് അഭിനയിക്കുന്നത്.

കരിങ്കണ്ണൻ പോലുള്ള ചിത്രങ്ങളിൽ നായകനായി കോമഡി പ്രധാന കഥാപാത്രം ചെയ്തു. അസൂയക്കാരൻ, പരദൂഷണം.. അങ്ങനെയുള്ള കഥാപാത്രങ്ങൾ ധാരാളം ചെയ്തതുകൊണ്ട് ഈ ഒരു മാറ്റം പ്രേക്ഷകർ എങ്ങനെ ഉൾക്കൊള്ളുന്നു എന്ന് തോന്നിയിട്ടുണ്ടോ?

ഞാൻ സീരിയസ് കഥാപാത്രങ്ങൾ കൂടുതൽ ഇഷ്ടപ്പെടുന്നു. ഉന്നാവ് എന്ന ഒരു സീരിയസ് നാടകം ഞാനും എന്റെ ഭാര്യയും കൂടി അവതരിപ്പിക്കുകയുണ്ടായി. കുട്ടികൾ ഇല്ലാത്ത ദമ്പതിമാർ, കുട്ടിക്ക് വേണ്ടി ഒരു പാട് ഹോർമോൺ ഇഞ്ചക്ഷനു ശേഷം അവളുടെ, ആരോഗ്യത്തെ ബാധിക്കുന്ന ഒരു കഥാപാത്രം. പേക്ഷകർ ആ നാടകം സ്വീകരിച്ചു.