അഭയകുമാറും അനിൽകുര്യനും ഓട്ടത്തിലാണ്

ഫാമിലി സബ്ജക്ടുകൾക്കാണ് പ്രാധാന്യം നൽകുന്നത്

- എം.എസ്. ദാസ് മാട്ടുമന്ത

ചിരിയും ചിന്തയും സമന്വയിപ്പിക്കുന്ന ചിത്രമായ പ്രിയൻ ഓട്ടത്തിലാണ് തിയേറ്ററുകളിൽ മികച്ച പ്രതികരണം സൃഷ്ടിച്ചപ്പോൾ തിരക്കഥാകൃത്തുക്കളായ അഭയകുമാറിന്റെയും അനിൽ കുര്യന്റെയും മൊബൈൽ ഫോണുകൾക്ക് വിശ്രമമില്ലായിരുന്നു. സിനിമ കണ്ട് അഭിനന്ദനം അറിയിച്ചവരോടെല്ലാം വിനയത്തോടെ ഇരുവരും മറുപടി പറഞ്ഞുകൊണ്ടിരുന്നു. സോഫ്റ്റ് വെയർ എഞ്ചിനീയർമാരായ അഭയകുമാറും, അനിൽ കുര്യനും ചേർന്ന് മലയാള സിനിമയിൽ ജീവിതഗന്ധിയായ കഥകൾക്ക് പിറവി നൽകാനുള്ള തയ്യാറെടുപ്പിലാണ്.

ജയസൂര്യ നായകനായ പുണ്യാളൻ അഗർബത്തീസിലൂടെ തുടങ്ങിയ ഇവരുടെ തിരകഥാരചനയിലൂടെയുള്ള സഞ്ചാരം സു.. സു.. സുധിവാത്മീകം, ചതുർമുഖം, പ്രിയൻ ഓട്ടത്തിലാണ് തുടങ്ങിയ സിനിമകൾ പിന്നിട്ട് ഇപ്പോൾ അഞ്ചാമത്തെ ചിത്രമായ കുഞ്ഞമ്മിണീസ് ഹോസ്പിറ്റലിൽ എത്തിനിൽക്കുന്നു.

മലയാളസിനിമയിൽ നിരന്തരമായി ഉയരുന്ന കഥാദാരിദ്ര്യമെന്ന വിലാപത്തിന് ഇവർ ഫുൾസ്റ്റോപ്പിടുകയാണ്. കഥകൾ തേടി അലയേണ്ട കാര്യമില്ലെന്നും, നമുക്ക് ചുറ്റുമുള്ള ജീവിതങ്ങളിൽ പച്ചയായ കഥകളുടെ അനുഭവവേദ്യമായ ഇതിവൃത്തമുണ്ടെന്നും ഇരുവരും സാക്ഷ്യപ്പെടുത്തുന്നു.

അഭയകുമാറും, അനിൽകുര്യനും സംവിധായകൻ രഞ്ജിത്ത് ശങ്കറും കൊച്ചിയിൽ ഇൻഫോസിസിന്റെ ഒരേ കമ്പനിയിലാണ് ജോലി ചെയ്തത്. ചാലക്കുടിയിൽ ജനിച്ചുവളർന്ന അഭയകുമാർ ഇരിങ്ങാലക്കുട ക്രൈസ്റ്റ് കോളേജിൽ നിന്ന് പോസ്റ്റ് ഗ്രാജുവേഷന് ശേഷം എം.സി.എയും എം.ബി.എയും കഴിഞ്ഞാണ് കമ്പ്യൂട്ടർ പഠനം പൂർത്തിയാക്കി സോഫ്റ്റ് വെയർ എഞ്ചിനീയറായി ജോലിയിൽ പ്രവേശിച്ചത്. വർഷങ്ങളായി മലയാളം ബ്ലോഗിൽ അഭയകുമാർ എഴുതാറുണ്ട്.

അനിൽ കുര്യനാവട്ടെ തമിഴ്നാട്ടിലെ ഈറോഡ് കെ.എസ്.ആർ എഞ്ചിനീയറിംഗ് കോളേജിൽ നിന്ന് കമ്പ്യൂട്ടർ സയൻസ് പഠനം പൂർത്തിയാക്കിയശേഷം ടാറ്റ കമ്പനിയിൽ(ടി.സി.എസ്) 18 വർഷം ജോലി ചെയ്തു. അമേരിക്കയിലും, ഇംഗ്ലണ്ടിലും ജോലി ചെയ്ത് അനിൽ കുര്യൻ ഇപ്പോൾ ഐ.ടി കൺസൾട്ടന്റാണ്. രഞ്ജിത്ത് ശങ്കർ സംവിധാനം ചെയ്ത മോളി ആന്റി റോക്സ് എന്ന ചിത്രത്തിൽ സ്ക്രിപ്റ്റിന്റെ മേൽനോട്ടവുമായി അനിൽ കുര്യനുമുണ്ടായിരുന്നു. ബ്ലോഗിൽ സിനിമകളെക്കുറിച്ചുള്ള റിവ്യൂ എഴുതാറുണ്ട്.

ഇരിങ്ങാലക്കുടയിൽ ചിത്രീകരണം നടക്കുന്ന കൊച്ചമ്മിണീസ് ഹോസ്പിറ്റൽ എന്ന സിനിമയുടെ സെറ്റിലാണ് ഇവരെ കണ്ടത്. സോഫ്റ്റ്വെയർ എഞ്ചിനീയർമാരായ അഭയകുമാർ അനിൽകുര്യൻ കൂട്ടുകെട്ടിന്റെ തിരക്കഥാരചനയുടെ വഴികളിലൂടെ നമുക്ക് കടന്നുചെല്ലാം..