ദേശീയ അവാർഡിന്റെ നിറവിൽ നഞ്ചിയമ്മ

ഇന്ത്യയിലെ മികച്ച ഗായികയായി തെരഞ്ഞെടുക്കപ്പെട്ട നഞ്ചിയമ്മ ഒരു ചരിത്രമാണ്. ഇന്ത്യയിൽ ആദ്യമായി ഗോത്രവർഗ്ഗ വിഭാഗത്തിലെ ദ്രൗപതി മുർമു രാഷ്ട്രപതിയായി തെരഞ്ഞെടുക്കപ്പെട്ട സമയത്താണ് ഒരു ഗോത്രവർഗ്ഗകലാകാരിയായ നഞ്ചിയമ്മയ്ക്ക് ഇന്ത്യൻ ചലച്ചിത്ര അവാർഡ് നിർണ്ണയ ചരിത്രത്തിൽ ആദ്യമായി മികച്ച ഗായികയ്ക്കുള്ള പുരസ്കാരം ലഭിച്ചത്.

- എം.എസ്.ദാസ് മാട്ടുമന്ത

അട്ടപ്പാടിയിലെ നക്കുപ്പതിയിലുള്ള വീട്ടിൽ നിന്ന് രാവിലെ പശുക്കളെ മേയ്ക്കാൻ പോയ നഞ്ചിയമ്മ വൈകിട്ട് വീട്ടിലെത്തിയപ്പോഴാണ് ദേശീയ പുരസ്കാരം ലഭിച്ച വിവരം അറിയുന്നത്. നഞ്ചിയമ്മയെ സച്ചിയുടെ മുന്നിലെത്തിച്ച അട്ടപ്പാടിയിലെ ഫോറസ്റ്റ് റാപ്പിഡ് റെസ്പോൺസ് ടീം അംഗവും നഞ്ചിയമ്മ ആദ്യമായി പാട്ട് പാടിയ ആസാദ് ഗോത്രകലാ സമിതിയുടെ സാരഥിയുമായ എസ്.പഴനിസ്വാമി നഞ്ചിയമ്മയുടെ വീട്ടിലെത്തി മധുരം നൽകിയതോടെ അഭിനന്ദനങ്ങളുടെ പ്രവാഹം തന്നെയായിരുന്നു. സ്വന്തമായി ഫോണില്ലാത്തതിനാൽ പഴനിസ്വാമിയുടെയും, മക്കളുടെയും ഫോണിലൂടെ അഭിനന്ദനം അറിയിച്ചവരോടൊക്കെ നഞ്ചിയമ്മ നന്ദി പറഞ്ഞു.

ദേശീയ അവാർഡ് ലഭിച്ചതിനെക്കുറിച്ച് ചോദിച്ചപ്പോൾ നഞ്ചിയമ്മ ഇങ്ങിനെ പറഞ്ഞു.

"എനിക്ക് ഇന്ത്യയിലെ മികച്ച ഗായികയ്ക്കുള്ള അവാർഡ് ലഭിച്ചതിൽ വളരെയധികം സന്തോഷമുണ്ട്. എന്റെ ഗോത്രസമൂഹത്തിന്റെ ഭാഷയിലൂടെയാണ് ഞാൻ പാട്ട് പാടി വളർന്നത്. ഞങ്ങളുടെ ഭാഷയില്ലെങ്കിൽ ആടുകളേയും പശുക്കളേയും മേയ്ച്ചു നടന്ന ഞാൻ പാട്ടുകാരി ആവില്ലായിരുന്നു. അയ്യപ്പനും കോശിയിലൂടെ എന്റെ പാട്ട് ലോകത്തിന്റെ മുന്നിലെത്തിച്ചത് സംവിധായകൻ സച്ചിയാണ്.അതുകൊണ്ട് തന്നെ എനിക്ക് ലഭിച്ച ഈ അവാർഡ് ഞാൻ പ്രിയപ്പെട്ട സച്ചിക്കായി സമർപ്പിക്കുന്നു.

“കളക്കാത്ത സന്ദനമാരോം,
വൈകുവോകാ പൂത്തിരിക്കോ..,
പൂപറിക്ക പോകിലാമോ...
വിമേനാത്ത പാക്കിലമോ..ലാലാ ലെ ലാല ലാലെ....

അയ്യപ്പനും കോശിയും എന്ന ചിത്രത്തിൽ അട്ടപ്പാടിയിലെ ആദിവാസികളുടെ തനതായ ഈ നാടൻപാട്ട് പാടിയതിനാണ് മികച്ച ഗായികക്കുള്ള ദേശീയ പുരസ്കാരം നഞ്ചിയമ്മയെ തേടിയെത്തിയത്. ഗാനരംഗത്ത് പാടി അഭിനയിച്ച നഞ്ചിയമ്മ മലയാളികളുടെ മനസ്സുകളിൽ ജനപ്രിയ ഗായികയായി മാറുകയും ചെയ്തു.

സോഷ്യൽ മീഡിയയിൽ മൂന്നരക്കോടി ആളുകളാണ് ഈ ഗാനം ആസ്വദിച്ചത്. അയ്യപ്പനും കോശിയും എന്ന ചിത്രത്തിലെ ഈ ടൈറ്റിൽ സോങ്ങിലൂടെ മലയാള സിനിമയിലെ ജനപ്രിയ പാട്ടുകാരിക്കുള്ള സംസ്ഥാന സർക്കാരിന്റെ സ്പെഷ്യൽ ജൂറി പുരസ്കാരവും നേരത്തെ നഞ്ചിയമ്മയ്ക്ക് ലഭിച്ചിരുന്നു.

കൂടെ അഭിനയിച്ച പൃഥ്വിരാജിനെയും ബിജു മേനോനെയും തനിക്കറിയില്ലെന്ന നഞ്ചിയമ്മയുടെ വാക്കുകൾ സോഷ്യൽ മീഡിയയിൽ വയറലായിരുന്നു.

ഇന്ത്യയിലെ മികച്ച ഗായികയ്ക്കുള്ള ദേശീയ പുരസ്കാരം ലഭിച്ച നഞ്ചിയമ്മ സംസാരിക്കുകയാണ്....