മണിരത്നത്തിന്റെ പൊന്നിയിൻ സെൽവൻ

ട്രെയ്ലർ- ഓഡിയോ ലോഞ്ച് ചെന്നൈയിൽ പ്രൗഢഗംഭീരമായി നടന്നു

- ജി. കൃഷ്ണൻ

ഒരു ബ്രഹ്മാണ്ഡ സിനിമയും കൂടി പ്രേക്ഷകരുടെ മുന്നിലേയ്ക്ക്..

"പൊന്നിയിൻ ശെൽവൻ.

' തമിഴ് സിനിമാരംഗത്തെ മെഗാഹിറ്റ് ഡയറക്ടറായ മണി രത്നം സംവിധാനം ചെയ്തിരിക്കുന്ന ഈ സിനിമയുടെ ട്രെയ്ലർ ലോഞ്ച് ഇക്കഴിഞ്ഞ സെപ്റ്റംബർ ആറാം തീയതി ചെന്നൈയിൽ നെഹ്റു ഇൻഡോർ സ്റ്റേഡിയത്തിൽ നടന്നു.

തമിഴ് സിനിമാവേദി ഇതു വരെ കണ്ടിട്ടുള്ളതിൽ നിന്നും വ്യത്യസ്തവും പ്രൗഢഗംഭീരവുമായ ഒരു വലിയ ചടങ്ങിനാണ് ഈ സായംസന്ധ്യ സാക്ഷ്യം വഹിച്ചത്.

തമിഴ് സാഹിത്യരംഗത്തെ ഇതിഹാസ സാഹിത്യകാരനായ കൽക്കി കൃഷ്ണമൂർത്തിയുടെ വിശ്വപ്രസിദ്ധമായ ചരിത്ര നോവലാണ് പൊന്നിയിൽ ശെൽവൻ. ആ ചരിത്രനോവലിലൂടെ നിരവധി കഥാപാത്രങ്ങളെയാണ് പുതിയ തലമുറ പരിചയപ്പെടാൻ പോകുന്നത്. ചോള സാമ്രാജ്യത്തിന്റെ നൂറ്റാണ്ടു കൾക്ക് മുൻപുള്ള ഒരേട് മാത്രമാണിപ്പോൾ സിനിമയാകുന്നത്. ഒന്നാം ഭാഗത്തിലൂടെ നാം അത് ദർശിക്കാൻ പോകുന്നു. പകയും സംഘർഷങ്ങളും പ്രതിസന്ധികളും ശത്രുതയും ഒക്കെ നേരിടുന്ന മറ്റൊരേട് രണ്ടാം ഭാഗത്തിലുണ്ടാകും.

ദളപതി, ബോംബെ, തിരുടാ തിരുടാ, കന്നത്തിൽ മുത്തമിട്ടാൽ... ഇരുവർ തുടങ്ങി നിരവധി സിനിമകൾ തമിഴ് സിനിമാലോകത്തിന് സമ്മാനിച്ച മണിരത്നത്തിന്റെ ഈ ചുവടുവയ്പ് പ്രേക്ഷകർ ആകാംക്ഷയോടെ കാത്തിരിക്കുകയാണ്. കഴിഞ്ഞ മൂന്നുവർഷക്കാലമായി മണിരത്നം ഈ സിനിമയുടെ പുറകെ ആയിരുന്നു.

അഞ്ച് ഭാഷകളിലായി പ്രദർശനത്തിന് തയ്യാറാകുന്ന ഈ സിനിമ ഇന്ത്യൻ സിനിമയിലെ തന്നെ ചരിത്ര സംഭവമായി മാറുന്ന കാഴ്ച ദക്ഷിണേന്ത്യൻ സിനിമാലോകം കാണാൻ പോകുകയാണ്.

ട്രെയ്ലർ റിലീസ് ചെയ്യും മുൻപേ സിനിമയിലെ ചില കഥാപാത്രങ്ങളെയും അത് അവതരിപ്പിക്കുന്ന അഭിനേതാക്കൾ ആരെന്നും പുറത്തു വിട്ടിരുന്നു.