വാലാട്ടി ചരിത്രം കുറിച്ചപ്പോൾ...

ഇന്ത്യയിലെ തന്നെ ആദ്യത്തെ അനിമൽ സിനിമയായ വട്ടിയുടെ സംവിധായകൻ ദേവൻ മനസ്സ് തുറക്കുന്നു

- രജനി കൃഷ്ണ

അച്ഛൻ ജയൻ മുളങ്ങാട്, പണ്ട് പല സിനിമകളുടെയും നിർമ്മാതാവ് ആയിരുന്നു. ദൂരദർശനിൽ സീരിയലും, ഡോക്യുമെന്ററിയും മറ്റും ചെയ്തിട്ടുള്ള അച്ഛന്റെ വലിയ മോഹം ആയിരുന്നു. ഒരു സിനിമ സംവിധാനം ചെയ്യണം എന്നത്.

എന്നാൽ, കുടുംബത്തിന് വേണ്ടി പല സാഹചര്യങ്ങൾ കൊണ്ട്, അച്ഛന് സിനിമയോട് വിടപറഞ്ഞ് മറ്റൊരു ജോലിയുമായി വിദേശത്തേയ്ക്ക് പോകേണ്ടി വന്നു. അച്ഛൻ പുറത്തേക്ക് പോയപ്പോൾ, അതേ മോഹം എന്റെയുള്ളിലും ഉടലെടുത്ത കാര്യം ആരും അറിഞ്ഞില്ല. സിനിമയെക്കുറിച്ച് ഞാൻ ഇടയ്ക്ക് വീട്ടിൽ സംസാരിക്കുമായിരുന്നെങ്കിലും, എല്ലാവരും കരുതിയത് പതുക്കെ പഠനവും, അത് കഴിഞ്ഞ് ജോലിയും ഒക്കെ ആകുമ്പോൾ ഞാൻ അച്ഛനെപ്പോലെതന്നെ, സിനിമയോട് ബൈ പറയും എന്നായിരുന്നു. പക്ഷേ, എന്തുകൊണ്ടോ, മുമ്പോട്ടുപോകുംതോറും എന്റെയും ഇടം സിനിമ തന്നെയാണെന്ന് മനസ്സ് പറഞ്ഞു കൊണ്ടേയിരുന്നു. അങ്ങനെയാണ് വി.കെ. പ്രകാശ് സാറിന്റെ പരസ്യചിത്രങ്ങളിൽ അസിസ്റ്റ് ചെയ്യുന്നത്. ശേഷം മാതൃഭൂമി ചാനലിൽ പ്രോഗ്രാം പ്രൊഡ്യൂസറായി ജോയിൻ ചെയ്തു. അങ്ങനെ ഇരിക്കുമ്പോഴാണ് അച്ഛൻ നീണ്ട 32 വർഷങ്ങൾക്കു ശേഷം ഒരു സിനിമ സംവിധാനം ചെയ്യുന്നത്. "ഹലോ നമസ്തേ'എന്ന ചിത്രത്തിൽ ഞാൻ സഹസംവിധായകൻ ആയിരുന്നു. ഈ അനുഭവങ്ങൾ എല്ലാം എന്നെ സിനിമ എന്ന ലക്ഷ്യത്തിലേക്ക് അടുക്കാൻ ഒരുപാട് സഹായിച്ചിട്ടുണ്ട്.

ജീവിതത്തിലെ ഏറ്റവും മോശസമയം അതായിരുന്നു!!! റിലീസായ ആദ്യ ചിത്രം വാലാട്ടി ആയിരുന്നെങ്കിലും, എന്റെ ശ്രമവും, ആഗ്രഹവും ആദ്യം വാലാട്ടിക്ക് വേണ്ടി ആയിരുന്നില്ല. രണ്ട് കഥകൾ കൊണ്ട് ഒരുപാട് നടന്നു. തുറന്നു പറഞ്ഞാൽ, ജീവിതത്തിലെ ഏറ്റവും മോശം സമയം അതായിരുന്നു. കുറെ അധികം സ്വപ്നങ്ങൾ മാത്രമാണ് അന്ന് എന്നെ മുന്നോട്ടു നയിച്ചിരുന്നത്. വർഷങ്ങൾ കഠിനപ്രയത്നം ചെയ്തിട്ടും, ആഗ്രഹിച്ച സിനിമ നടക്കാതെ ആകുമ്പോൾ ഒരു സിനിമാ മോഹിക്ക് ഉണ്ടാവുന്ന നിരാശ പറയേണ്ടതില്ലല്ലോ! മാനസികമായി ഞാൻ തളർന്നുപോയിരുന്നു. ഇനി എന്താണ് അടുത്തത് എന്ന് ചിന്തിക്കാൻ പോലും ആവാത്ത വണ്ണം ഇരുട്ടു നിറഞ്ഞ ദവസങ്ങളായിരുന്നു അത്.

പ്രതീക്ഷ നൽകിയത് വിജയ്ബാബു