ഈ പ്രഹസനങ്ങൾ എന്ന് കഴിയും

കാറ്റുള്ളപ്പോൾ തൂറ്റാമെന്ന മേനിയിൽ ഹേമക്കമ്മിറ്റി റിപ്പോർട്ടിന്റെ മറ പിടിച്ചുകൊണ്ട് കാശുണ്ടാക്കാൻ ഇറങ്ങിത്തിരിക്കുന്നവരെ കരുതലോടെ തന്നെ സമീപിക്കേണ്ടതുണ്ട്

- അനീഷ് മോഹനചന്ദ്രൻ

ആകെ അഭിനയിച്ചത് ഒന്നോ രണ്ടോ സിനിമയിൽ മാത്രം. പക്ഷേ, ആ നടിയെ പീഡിപ്പിക്കാത്തവരായി സിനിമാ ലോകത്ത് ആരുമില്ല. ഇതെന്ത് പാട്? കഴിഞ്ഞ കുറച്ചു ദിവസങ്ങളായി സൈബർ ഇടങ്ങളിൽ സജീവമായി ഉയരുന്ന ചോദ്യമിതാണ്. ഇതിനും മാത്രം ചൂഷണം ചെയ്യപ്പെടാൻ ഇരയ്ക്ക് എന്തുപറ്റി? അവർ അത്രകണ്ട് ബുദ്ധിശൂന്യ ആയിരുന്നോ? ഇനി അഥവാ ശരിക്കും ചൂഷണം ചെയ്യപ്പെട്ടുവെങ്കിൽ ഇത്രയും നാൾ പരാതിപ്പെടാതിരുന്നത് എന്തുകൊണ്ട്? ഒരു ഹേമക്കമ്മിറ്റി റിപ്പോർട്ടിന്റെ പശ്ചാത്തലം കാരണമായി പറയുന്നുണ്ടങ്കിലും പലതും അവിശ്വസനീയമാണ്. ചിലതെങ്കിലും നട്ടാൽ കു രുക്കാത്ത നുണകളും. മലയാള സിനിമാലോകത്തെ ഇപ്പോൾ പിടിച്ചു കുലുക്കിക്കൊണ്ടിരിക്കുന്ന മീ ടു ആരോപണത്തിന്റെ സീസൺ ടു വേർഷനെക്കുറിച്ച് പൊതുസമൂഹത്തിന്റെ പ്രതികരണങ്ങൾ ഇങ്ങനെപോകുന്നു.

പറഞ്ഞുവരുന്നത് മേൽവിവക്ഷിച്ച നടിയുടെ ആരോപണങ്ങളെക്കുറിച്ചല്ല. മറിച്ച് അതുണ്ടാക്കിയ ആഫ്റ്റർ എഫക്ട്സിനെക്കുറിച്ചാണ്. വരുന്നവരും പോകുന്നവരുമെല്ലാം ആക്ഷേപങ്ങളും ആരോപണങ്ങളും ഉന്നയിച്ചുകൊണ്ടേ ഇരിക്കുമ്പോൾ മലയാള സിനിമാലോകം ഒന്നടങ്കം സംശയത്തിന്റെ നിഴലിലാകുന്നത് സ്വാഭാവികം. അങ്ങനെ വരുമ്പോൾ ഇൻഡസ്ട്രിയിൽ നിക്ഷേപം ഇറക്കാൻ പലരും മടിക്കുന്നു എന്നതാണ് ഗുരുതരമായ പ്രതിസന്ധി. താൽക്കാലികമാണെങ്കിലും ഇപ്പോഴത്തെ വിവാദങ്ങൾ പ്രേക്ഷകമനസ്സിനെ ആഴത്തിൽ സ്വാധീനിക്കുമെന്നും അതിലൂടെ കുടുംബപ്രേക്ഷകർ ആരോപണവിധേയരുടെ സിനിമകളിൽ നിന്നും പിൻമാറുമെന്നുമാണ് പൊതുവിലയിരുത്തൽ.

അതുകൊണ്ടുതന്നെ ആരോപണ വിധേയർ അഭിനയിച്ച പല ചിത്രങ്ങളുടെയും റിലീസ് മാറ്റിവച്ചിരി ക്കുകയാണ്. ആരംഭിക്കാനിരിക്കുന്ന പല പ്രോജക്ടുകളും മാറ്റിവയ്ക്കുകയോ റീകാസ്റ്റിംഗ് നടത്തുകയോ ചെയ്യുന്നു.