ഇപ്പോൾ സിനിമയൊന്നുമില്ലേ?

സിനിമയിലെന്നപോലെ ജീവിതത്തിലും വ്യത്യസ്ത മേഖലകളിൽ ശോഭിക്കുന്ന രാജീവ്പിള്ളയോടൊപ്പം...

- അപ്പൂസ് കെ.എസ്

ഡെന്റിസ്റ്റ്, ആക്ടർ, മോഡൽ, സ്പോർട്സ്മാൻ തുടങ്ങിയ മേഖലകളിൽ കൈത്തഴക്കമുള്ള ആളാണല്ലോ താങ്കൾ. പക്ഷേ രാജീവ്പിള്ള എന്ന വ്യക്തി പ്രേക്ഷകരുടെയിടയിൽ ശ്രദ്ധിക്കപ്പെട്ടത് ഇവയിൽ ഏത് റോളിൽ ആണ്?

കൂടുതൽ ആളുകളും ചോദിക്കുന്നത് "ഇപ്പോ സിനിമ ഒന്നുമില്ലേ?' എന്നാണ്. ആളുകൾ എന്നെ തിരിച്ചറിയുന്നത് ഒരു നടൻ എന്ന റോളിൽ തന്നെയാണ് എന്നാണ് ഞാൻ മനസ്സിലാക്കുന്നത്.

ഇപ്പോൾ സിനിമയൊന്നുമില്ലേ? എന്ന ആളുകളുടെ ചോദ്യത്തിന് താങ്കൾ എന്ത് മറുപടിയാണ് കൊടുക്കുക

കൂടുതലും മലയാളി പ്രേക്ഷകർ ആണ് ഈ ചോദ്യം ചോദിക്കുക. തമിഴിലും തെലുങ്കിലും ഒക്കെ ഇപ്പോൾ ഏത് സിനിമയാണ് ചെയ്യുന്നത്?' എന്നായിരിക്കും ചോദ്യം. പക്ഷേ മലയാളികളുടെ ഈ ചോദ്യത്തിന് ഞാൻ ഫൈൻഡ് ആകാറൊന്നുമില്ല കേട്ടോ. കാരണം അവരെ കുറ്റം പറയാൻ പറ്റി ല്ല, എന്നെ ഇൻഡസ്ട്രിയിൽ കണ്ടിട്ട് മൂന്ന് മൂന്നര കൊല്ലത്തോളമായല്ലോ.

അപ്പോൾ ഈ മൂന്നുവർഷത്തെ ഗ്യാപ്പിൽ എവിടെയായിരുന്നു?

തമിഴിലും തെലുങ്കിലും ഒക്കെ അഭിനയിച്ചിട്ടുണ്ട്. മലയാളത്തിൽ ഈ മൂന്നരക്കൊല്ലം ചെയ്തിരുന്നെങ്കിൽ കിട്ടുമായിരുന്ന സിനിമകളെക്കാൾ കൂടുതൽ തന്നെ തമിഴിലും തെലുങ്കിലുമായി ചെയ്യാൻ പറ്റി എന്നുള്ളതാണ് ഈ ഗ്യാപ്പിലുണ്ടായ വലിയൊരു കാര്യം.

സിനിമയിൽ അവസരങ്ങൾ ലഭിക്കാത്ത സമയങ്ങളിൽ എന്തൊക്കെയാണ് ആക്ടിവിറ്റികൾ?

മുംബയിൽ ഞങ്ങൾക്കൊരു തീയേറ്റർ ഗ്രൂപ്പ് ഉണ്ട്. പണ്ട് മുതൽ തന്നെ ഞാൻ അവിടെപ്പോയി ഡാമ ചെയ്തിരുന്നു. അത് ഞാൻ ഇപ്പോഴും തുടരുന്നുണ്ട്. എന്റെ സന്തോഷത്തിന് വേണ്ടിയുള്ള കാര്യങ്ങൾ ഞാൻ തന്നെ കണ്ടെത്തുകയാണ് ചെയ്യുക.

മലയാളികൾ ആദ്യമായി ഒരു മോഡൽ ലുക്കിലുള്ള നടനെ കാണുന്നത് താങ്കളിലായിരിക്കും, പക്ഷേ താങ്കൾ 2011 ൽ ആക്ടീവ് മോഡലിംഗ് ഉപേക്ഷിച്ചതാണ്. എന്നാൽ ഇപ്പോഴും മലയാളികളുടെ മനസ്സിൽ താങ്കൾക്ക് ഒരു മോഡൽ എന്നുള്ള സ്ഥാനം വലിയ തോതിൽ തന്നെ നിലനിൽക്കുന്നുണ്ട്. അതിനെപ്പറ്റി?