ജി എം കടുക് വരുന്നു കേന്ദ്രാനുമതിയോടെ

കൃഷിക്ക് കേന്ദ്രസർക്കാർ അനുമതി നേടുന്ന ആദ്യത്തെ ജിഎം ഭക്ഷ്യവിള

- ഡോ.ജോസ് ജോസഫ്

ജനിതകവ്യതിയാനം വരുത്തിയ ധാരാ മസ്റ്റാർഡ് ഹൈബ്രിഡ് 11 (ഡിഎം എച്ച് 11) എന്ന കടുക് സങ്കരയിനം കൃഷി ചെയ്യാൻ കേന്ദ്രസർക്കാർ അനുമതി നൽകിയത് ഇന്ത്യൻ കാർഷിക ചരിത്രത്തിലെ നിർണായക സംഭവമാണ്. കേന്ദ്ര വനം പരിസ്ഥിതി കാലാവസ്ഥാ വ്യതിയാന മന്ത്രാലയത്തിന്റെ നിയന്ത്രണത്തിലുള്ള ജനറ്റിക് എൻജിനീയറിങ് അപ്രൈസൽ കമ്മറ്റി (ജി ഇ എ സി ) നൽകിയ പാരിസ്ഥിതികാനുമതി പ്രകാരം ഇന്ത്യയിൽ വാണിജ്യാടിസ്ഥാനത്തിൽ കൃഷി ചെയ്യാവുന്ന പാരിസ്ഥിതിക ആദ്യത്തെ ജി എം ഭക്ഷ്യവിളയാണ് ഡിഎം എച്ച് 11. ബിടി പരുത്തി വാണിജ്യാടിസ്ഥാനത്തിൽ കൃഷി ചെയ്യാൻ 2002 ൽ കേന്ദ്രം അനുമതി നൽകിയിരുന്നു. 2009 ൽ ബി ടിവഴുതന അനുമതിയുടെ അന്തിമ ഘട്ടത്തിൽ എത്തിയെങ്കിലും അന്ന ത്തെ പരിസ്ഥിതി മന്ത്രി ജയ്റാം രമേശ് 10 വർഷത്തെ മൊറട്ടോറിയം പ്രഖ്യാപിച്ചു. ഈ നിരോധനം ഇനിയും നീക്കിയിട്ടില്ല. 

ഇന്ത്യയിൽ ജനിതക പരിവർത്തനം ചെയ്ത വിത്തിനങ്ങൾക്ക് അന്തിമ അനുമതി നൽകുന്ന സ്റ്റാറ്റ്യൂട്ടറി സമിതിയാണ് ജി ഇ എ സി. ജി എം കടുകിനു പാരിസ്ഥിതിക അനുമതി നൽകിയ സമിതിയുടെ തീരുമാനം ഒക്ടോബർ 25 കേന്ദ്രസർക്കാർ ശരിവച്ചു. ആർ എസ് എസിനോട് ആഭിമുഖ്യമുള്ള സ്വദേശി ജാഗരൺ മഞ്ചിന്റെയും പരിസ്ഥിതി സംഘടനകളുടെയും എതിർപ്പ് അവഗണിച്ചാണ് കേന്ദ്ര നടപടി. സുപ്രധാനമായ ഈ നയവ്യതിയാനം ഭക്ഷ്യവിളകൾ ഉൾപ്പെടെ അംഗീകാരം കാത്തു കിടക്കുന്ന ഒട്ടേറെ പുതിയ ജി എം വിത്തിനങ്ങൾക്ക് വാതിൽ തുറക്കും.

5 വർഷത്തെ കാത്തിരിപ്പ്