കാമധേനുക്കൾ നൽകി സൈമൺ കൊതിച്ചതെല്ലാം

"ഫാമിലെയും വീട്ടിലെയും ചെലവ് രാവിലത്തെ പാലിന്റെ വിലയിൽ നിൽക്കും. ഉച്ചകഴിഞ്ഞുള്ള 50 ലീറ്റർ പാലിന്റെ വില ലാഭമാണ്.

- ഡോ.ജി.എസ്.അരുൺകുമാർ

സ്ഥലമൊരുക്കി റബർ തൈകൾ നട്ടുകൊടുക്കുന്ന പണിയാണു സൈമൺ ചെയ്തുവന്നത്. തിരുവനന്തപുരം ജില്ലയിൽ നെയ്യാറ്റിൻകര മുനിസിപ്പാലിറ്റി ഭാഗത്ത് സൈമൺ താമസിച്ചിരുന്ന മാറനല്ലൂർ പഞ്ചായത്തിൽ 13 വർഷം മുൻപ് ഒരിക്കൽ ഒരാൾക്കുവേണ്ടി റബറിനും മറ്റു കൃഷികൾക്കുമായി നിലമൊരുക്കുന്നതിനിടയിലാണ് സ്ഥലമുടമ രണ്ടു പശുക്കളെ വാങ്ങുന്നത്. കൃഷിയിടത്തിലെ പണി തീർന്നപ്പോൾ സൈമൺ പശുക്കളുടെ പരിപാലനം ഏറ്റെടുത്തു. ഉദ്യോഗസ്ഥനായിരുന്ന സ്ഥലമുടമ സ്ഥലംമാറ്റമായപ്പോൾ സൈമൺ അവയെ വാങ്ങി വളർത്തി.

ഇന്നു സൈമണിനു 10 പശുക്കൾ. പണിയെല്ലാം ഒറ്റക്ക് ചെയ്യുന്നു. ദിവസേന ശരാശരി 150 ലീറ്റർ പാലുൽപാദനം. ക്ഷീരസംഘത്തിൽ വിൽപന.