ഡോക്ടർ ഗോശാലയിലാണ്

ജൈവകൃഷിയും നാടൻപശുക്കളുമായി കൊല്ലത്തെ നന്ദനം ഫാം

- രജീഷ് നിരഞ്ജൻ

നൂറ്റാണ്ടു പിന്നിട്ട കാർഷികത്തറവാട്ടിൽ സമ്മിശ്ര കൃഷിയും ഗോശാലയുമായി യുവ ഡോക്ടർ. കൊടുങ്ങല്ലൂർ ക്രാഫ്റ്റ് ഹോസ്പിറ്റൽ & റിസർച് സെന്ററിലെ ഗൈനക്കോളജിസ്റ്റും വന്ധ്യത ചികിത്സാവിദഗ്ധനുമായ ഡോ. എം.എസ്. ഉണ്ണിക്കൃഷ്ണനാണ് ആതുര സേവനവും കാർഷിക സപര്യയും സമന്വയിപ്പിക്കുന്നത്.

കുട്ടിക്കാലം മുതൽ കൃഷി ഡോ. ഉണ്ണിക്കൃഷ്ണന് ഹരമാണ്. അമ്മയുടെ അച്ഛനും അച്ഛന്റെ അച്ഛനും കർഷകരായിരുന്നു. കൊല്ലം കരിക്കോട് കുറ്റിച്ചിറയിലെ പുലമൺ എന്ന കാർഷിക കുടുംബത്തിലാണ് ജനനം. അമ്മയുടെ തറവാടായ ഇവിടെ പണ്ടു മുതലേ കൃഷിയും പശുവളർത്തലുമുണ്ട്. നാലേക്കർ സ്ഥലത്താണ് ഡോക്ടറുടെ സമ്മിശ്രകൃഷിയും ഗോശാലയും. നൂറ്റാണ്ടു പഴക്കമുള്ള നാലുകെട്ടിനോടു ചേർന്ന ഒന്നര ഏക്കറിൽ വെണ്ട, വഴുതന, പയർ, പാവൽ, മത്തൻ, വെള്ളരി, ചീര തുടങ്ങിയ പച്ചക്കറികളും വിവിധയിനം മാവുകൾ, പ്ലാവുകൾ, അബിയു റംബുട്ടാൻ, മാങ്കോസ്റ്റിൻ, സപ്പോട്ട, ജബോട്ടിക്കാബ തുടങ്ങിയ പഴവർഗങ്ങളും സമൃദ്ധമായി വളരുന്നു.