കൂടെക്കൂട്ടാം അരുമകളെ വീണ്ടെടുക്കാം ഉന്മേഷം

ജീവിതസായാഹ്നത്തിലെ ഏകാന്തതയും വിരസതയുമകറ്റാൻ അരുമ വളർത്തൽ ഉപകരിക്കും

- ഡോ. എം.മുഹമ്മദ് ആസിഫ്

പ്രായമായവരിലെ ഓർമക്കുറവും അരുമമൃഗങ്ങളുമായുള്ള സാമീപ്യവും തമ്മിൽ ഏതെങ്കിലും തരത്തിൽ ബന്ധമുണ്ടോ എന്നു കണ്ടെത്താൻ അമേരിക്കയിലെ ടെമ്പിൾ യൂണിവേഴ്സിറ്റിയുടെ കീഴിലുള്ള സ്കൂൾ ഓഫ് മെഡിസിനിലെ ന്യൂറോളജി വിഭാഗത്തിൽ ഈയിടെ ഒരു ഗവേഷണം നടന്നു. 50 വയസ്സിനും അതിനു മുകളിലും പ്രായമുള്ള എണ്ണായിരത്തോളം ആളുകളിലായിരുന്നു പഠനം.

അരുമമൃഗങ്ങളുമായുള്ള സഹവാസം പ്രായമായവരിൽ ഓർമക്കുറവും ഡിമൻഷ്യ പോലുള്ള മാനസിക തകരാറു കളും കുറയ്ക്കാൻ സഹായിക്കും എന്നാണ് ഗവേഷണത്തിൽ കണ്ടത്. അരുമകളുമായുള്ള ഇടപെടലും അവയുമൊത്തുള്ള ജീവിതവും വാർധക്യത്തിൽ ഒട്ടേറെ ഗുണങ്ങൾ നൽകുമെന്ന ശാസ്ത്ര പഠനഫലങ്ങൾ വേറെയുമുണ്ട്.

യൗവനത്തിന്റെ ഊർജവും ഉന്മേഷവും തിരികെ കിട്ടാനും, ഏകാന്തതയുടെയും വിരസതയുടെയും ആഴം കുറയ്ക്കാനും ഒരു വാലാട്ടിയുടെ കൂട്ട് ആശ്വാസമാകും എന്നതുതീർച്ച. അതിനെ സാധൂകരിക്കുന്ന ഗവേഷ ണങ്ങൾ മാത്രമല്ല, പച്ചയായ ജീവിതാനുഭവങ്ങളും നമ്മുടെ പരിസരങ്ങളിൽത്തന്നെ ഏറെയുണ്ട്.

മസ്തിഷകത്തിന്റെ രസതന്ത്രം

അരുമകളെ ഓമനിക്കുമ്പോൾ, അവയെ വാത്സല്യത്തോടെ ഒന്നു നോക്കുമ്പോൾ പോലും മനുഷ്യശരീരത്തിൽ ഓക്സിറ്റോസിൻ എന്ന ഹോർമോണിന്റെ ഉൽപാദനം 6 ശതമാനം കണ്ടു കൂടുമെന്നാണ് ശാസ്ത്രം.

മസ്തിഷ്കത്തിലെ പിറ്റ്യൂറ്ററി ഗ്രന്ഥികൾ ഉൽപാദിപ്പിക്കുന്ന ഓക്സിറ്റോക്സിൻ ആനന്ദത്തിന്റെയും അനുഭൂതിയുടെയും ഹോർമോൺ എന്നാണ് അറിയപ്പെടുന്നത്. ഈ ഹോർമോണിന്റെ ഉൽപാദനം കൂടുന്നത് ഹൃദയമിടിപ്പ് സാധാരണനിലയിലാക്കാനും രക്തസമ്മർദം കുറയ്ക്കാനും സഹായിക്കും.