മൗറീഷ്യസിനെ വെല്ലാൻ എംഡി ടു

ഇരട്ടി വിളവു നൽകുന്ന പുതിയ പൈനാപ്പിൾ ഇനത്തിൽ പ്രതീക്ഷയോടെ കർഷകർ

സംസ്ഥാനത്തെ വാണിജ്യവിളകളിൽ മുൻനിരയിലുണ്ട് പൈനാപ്പിൾ. വർഷം 11,508 ഹെക്ടർ പൈനാപ്പിൾ കൃഷി സംസ്ഥാനത്തു നടക്കുന്നുവെന്നാണ് കൃഷിവകുപ്പിന്റെ കണക്ക്. എന്നാൽ, അതിന്റെ ഇരട്ടിയോളം സ്ഥലത്ത് കൃഷിയും ഏതാണ്ട് അഞ്ചര ലക്ഷം ടൺ വാർഷികോൽപാദനവും സംസ്ഥാനത്തുണ്ടെന്നു പൈനാപ്പിൾ കർഷക സംഘടനകൾ പറയുന്നു. വർഷം 1,650 കോടിയോളം രൂപ സംസ്ഥാനത്തിനു നേടിക്കൊടുക്കുന്ന കൃഷിയിനമാണ് പൈനാപ്പിൾ. എന്നാൽ, കാലങ്ങളായി ഒരേ രീതിയിൽ കൃഷി തുടരുകയല്ലാതെ കാലാനുസൃതമായ മാറ്റങ്ങളൊന്നും ഈ രംഗത്തുണ്ടായിട്ടില്ല. എംഡി 2 ഇനം പോലുള്ള പുതിയ സാധ്യതകളിലേക്ക് ചില കർഷകരെങ്കിലും തിരിയുന്നത് ഈ സാഹചര്യത്തിലാണ്.

ഇക്കഴിഞ്ഞ ജൂണിൽ, മഹാരാഷ്ട്രയിലെ സിന്ധദുർഗ് മേഖലയിൽ ഒരു സ്വകാര്യ സംരംഭകൻ അവിടെയുള്ള ചില കർഷകരെ സംഘടിപ്പിച്ച് 200 ഏക്കറിൽ വിളയിച്ച എംഡി 2 പൈനാപ്പിൾ ഇനം അപേഡ (APEDA-Agriculture and Processed Food Products Export Development Authority) യുഎഇയിലേക്ക് കയറ്റുമതി ചെയ്യുകയുണ്ടായി. ഗോൾഡൻ പ്, സൂപ്പർ സ്വീറ്റ് എന്നെല്ലം വിശേഷണമുള്ള എംഡി 2 വിന് ലോക പൈനാപ്പിൾ വിപണിയിൽ ഏറെ മൂല്യമുണ്ട്. ഇന്ത്യൻ കൃഷി ചരിത്രത്തിലെ നാഴികക്കല്ലെന്നാണ് ഈ കയറ്റുമതിത്തുടക്കത്തെ അപേഡ വിശേഷിപ്പിച്ചത്.

തടസ്സങ്ങൾ കടന്ന്