વઢવાણાના કાંઠે પંખી મેળાની પૂર્વ તૈયારી

વઢવાણામાં વહેલા આવી જતા યાયાવર અને સ્વદેશી પક્ષીઓનું પક્ષી તીર્થ ખાતે આગમન શરૂ થઈ ગયું છે. પંખી અને પ્રકૃતિ પ્રેમી ડો.રાહુલ ભાગવત અને સીમા આભાળે એ 20 થી વધુ પ્રકારના પક્ષીઓની હાજરી નોંધી. ઠંડી વધવાની સાથે પક્ષીઓની અતિથિ સંખ્યા અને વૈવિધ્ય વધશે એવું એમનું અનુમાન છે.

પક્ષી તીર્થ વઢવાણામાં સાવ હળવા પગલે દેશી વિદેશી યાયાવર પક્ષીઓની પાપા પગલી થવા માંડી છે. જાણે કે વિશાળ શિયાળુ પક્ષી મેળાની પાંખાળી સૃષ્ટિના આ કાર્યવાહકોએ જોરશોર થી તૈયારી શરૂ કરી દીધી છે.

પક્ષી, પ્રકૃતિ અને વન્ય જીવોના તસવીરકાર ડો.રાહુલ ચાહક ભાગવત અને સીમા આભાળે એ રવિવારે વઢવાણા ખાતે જઈને આ પૂર્વ તૈયારીઓ નરી આંખે નિહાળીને સાપ જેવી લચકદાર ડોક વાળા એક સાથે ઉડતા બે સર્પગ્નિવ સહિત વિવિધ પક્ષીઓની રમણીય છબીઓ લીધી હતી.તેમનું અનુમાન છે કે દૂર દેશાવરોમાં થી અત્યાર સુધી ૨૦ જેટલી પ્રજાતિઓના( યાયાવર અને સ્થાનિક )પક્ષીઓનું ઓછી સંખ્યામાં પ્રાથમિક આગમન થઈ ગયું છે.