કેસૂડા ટ્રેલ!

> એકતા નગર ખાતે લીમડી રૂટની નજરે કેસૂડા ટ્રેલ!  > ત્રણ હજાર કેસૂડાના વૃક્ષોની બેજોડ સુંદરતા, કુદરતનું સાંનિધ્ય તમને મંત્રમુગ્ધ બનાવી દેશે!  > સ્ટેચ્યુ ઓફ યુનિટીની મુલાકાતે જાવ તો, કેસૂડા ઢેલની રોમાંચક યાત્રા કરવાનું ના ભૂલતા!  > પ્રકૃતિના ખોળામાં ટ્રેકિંગનો લ્હાવો લઇ, કેસૂડા વિશે રસપ્રદ માહિતી જાણીને આશ્ચર્યચકિત થયા દિલ્હીથી આવેલા પ્રવાસીઓ

કેસૂડો ! – ભાગ્યે જ કોઈ હશે જે આ નામથી અજાણ હશે. સંસ્કૃતમાં કિંશુક તરીકે ઓળખાતું આ વૃક્ષ ખાખરો અને પલાશ જેવા નામોથી પણ પ્રચલિત છે. ગરમીની શરૂઆત અને વસંતઋતુના આગમનની સાથે જ ચારે બાજુ પાનખર ઋતુમાં સૂકાયેલા વૃક્ષો કેસૂડાના કેસરી રંગથી ચિતરાઈ જાય છે. ત્યારે કેસરિયા રંગથી છવાયેલો કેસૂડો અદ્ભુત દેખાય છે. આવા જ મનોહર દ્રશ્યો હાલ જોવા મળી રહ્યા છે, એકતા નગરના જંગલોમાં.

સ્ટેચ્યુ ઓફ યુનિટીની મુલાકાતે આવતા પ્રવાસીઓને અહીંના વિવિધ પ્રવાસન સ્થળો ઉપરાંત જંગલમાં જોવા મળતા કેસૂડાના વૃક્ષો અંગે અસામાન્ય અને રસપ્રદ માહિતી મળી રહે તે માટે રાજ્ય સરકારે એકતા નગર ખાતે કેસૂડા ટ્રેલનું આયોજન કર્યું છે. તેજસ્વી નારંગી ફૂલોના છાંટા એકતા નગરના મનોહર દૃશ્યોને વધારે છે, જે આપણા વડાપ્રધાન શ્રી નરેન્દ્ર મોદીના વિઝનને આભારી છે.

એકતા નગરમાં કેસૂડાના હજારો વૃક્ષોનું જતન કરવામાં આવ્યું છે, જેને 'જંગલની જ્યોત' પણ કહેવાય છે. 'કેસૂડા ટ્રેલ' થકી પ્રવાસીઓ કેસૂડાની સુંદરતાનો લ્હાવો લઈ શકે છે. મુલાકાતીઓ આનંદદાયક ટ્રેકિંગની મજા સાથે કેસૂડા પ્રવાસ કરી શકે છે. આ પ્રવાસ માટે ૩ થી ૪ કિલોમીટરના ત્રણ ખાસ રૂટ બનાવવામાં આવ્યા છે.