સ્વબળે આત્મનિર્ભર

૦ સ્વબળે આત્મનિર્ભર બનવાની મહેચ્છા ધરાવતા યુવક/યુવતિઓનું ‘પ્રેરણા તીર્થ' ચનખલનું 'આર્ટિસ્ટ હાઉસ' ૦ પ્રકૃતિપ્રેમી પર્યટકોને સ્વયંને ઓળખવાની ઉમદા તક પૂરી પાડતા આ નૈસર્ગિક સ્થળે રચાશે પ્રકૃતિ અને સંસ્કૃતિનો સમન્વય ૦ સહિયાદ્રિની ગોદમાં, યોગ, નેચરોપથી, ગીત સંગીત, સાથે સેલ્ફ મેઇડ ટ્રેડિશનલ ફૂડ મહેમાનોને અનોખો અવસર પ્રદાન કરશે ૦ સર્જક પરિવારની સ્વપ્નસૃષ્ટિ સમા આર્ટિસ્ટ હાઉસમાં વ્યક્તિને પોતાના માંયલાને ઓળખવાની તક મળશેઃ

'કેવલ સ્વયં કો ખોજના હૈ, બાકી સબ તો ગુગલ પે હૈ હી'. માનવીને પોતાની આત્મખોજ માટે પ્રેરતી આ પંક્તિને ખરા અર્થમાં સાર્થક કરવી હોય, કે સાથે જ પોતાના માંહયલાને ઓળખવાનો અહેસાસ કરવો હોય, તો એના માટે નિરવ શાંતિ અને પ્રકૃતિનો ખોળો શ્રેષ્ઠ સ્થળ ગણાય. આવા જ કઈક હટકે પ્રકૃતિપ્રેમી પર્યટકો કે જેણે માત્ર ને માત્ર શાંતિ માટે પ્રવાસ કરવો હોય, કુદરતને અને પોતાને મનની આંખોથી નિરખવા હોય, કુદરત સાથે તાદાત્મ્યતા કેળવવી હોય, અને આંતરખોજ કરવી હોય, તો આવો અદભૂત માહોલ પ્રદાન કરતું એક સ્થળ, સહિયાદ્રિ પર્વતમાળાની ગોદમાં તમારી રાહ જુએ છે.

ડાંગ જિલ્લાના મુખ્ય મથક આહવાની સમીપે આવેલા ચનખલ ગામની સીમમાં, સહિયાદ્રિ પર્વતમાળાની શૃંખલાની વચ્ચે આવેલું 'આર્ટિસ્ટ હાઉસ' પ્રકૃતિ સાથે નાતો જોડવાનો અનોખો અવસર પુરો પાડે છે. નૈસર્ગિક માહોલ પ્રદાન કરતું આ સ્થળ ખાણીપીણીના શોખીન પ્રવાસીઓ માટે હરગીઝ નથી. એ ચોખવટ સાથે જણાવી દઉં કે, અંહી માનવી અને પ્રકૃતિના સુભગ સમન્વય થકી પોતાના અંતરાત્માને ઓળખવા માંગતા, અને મનની સાચી શાંતિ માટે કેવળ સ્વયંને શોધવા માંગતા પર્યટકો આ સ્થળનો લુફત ઉઠાવી શકે છે. આત્મનિર્ભર અને ખૂબ જ સંવેદનશીલ સર્જકોના પરિવારની સ્વપ્નસૃષ્ટિ જેવા આ સ્થળના કણકણમાં તેમના પરિશ્રમની પ્રસ્વેદની સુવાસ પ્રગટે છે.