இயற்கை வளம்...தனியாருக்கு தாரை வார்த்து தள்ளாடும் இந்தியா!

கார்பரேட்டுகளுக்கு ஜாக்பாட் அடித்தாற்போல் ஒரு செய்தி. செல்போன், மின்வாகனம் போன்றவற்றுக்கு பயன்படும் லித்தியம், காஷ்மீரின் ரியாசி மாவட்டத்தின் சலால்-ஹைமானா பகுதியில் 5.9 மில்லியன் டன் அளவுக்கு இருக்கிறதாம்.

கடந்த 2018-2019ல் பல்வேறு மாநிலங்களில் தொடங்கப்பட்ட புவியியல் ஆய்வின்போது தங்கம் உள்ளிட்ட 51 கனிமத்தொகுதிகள் கண்டுபிடிக்கப்பட்டன. அப்போதுதான் ஜம்மு காஷ்மீரிலும் லித்தியம் கண்டுபிடிக்கப்பட்டது. இதன்மூலம் 92 லட்சம் டன் கொண்ட சிலிக்கு அடுத்தப்படியாக, உலகின் லித்தியம் கையிருப்புள்ள இரண்டாவது நாடாக இந்தியா மாற வாய்ப்பென்று ஆட்சியாளர்கள் மகிழ்ந்துள்ளனர்.

பெட்ரோல், டீசலால் ஓடும் வாகனங்கள், இயந்திரங்களின் பயன்பாடு அதிகரித்த பிறகு ஐக்கிய அரபு அமீரகம், சவூதி அரேபியா, கத்தார், குவைத், பஹ்ரைன், ஈரான் போன்ற அரபு நாடுகள், ரஷியா உள்ளிட்ட நாடுகள் செல்வம் கொழிக்கும் நாடுகளாக மாறின. அதேபோல், இப்போதைக்கு வாகனம், இயந்திரங்களில் பயன்படுத்தும் லித்தியம் மூலம் இந்தியாவும் செல்வந்த நாடாக மாறும் என்று பெரு மகிழ்ச்சி கொண்டுள்ளனர். எல்லாம் சரிதான்... ஆனால், தற்போதைய நிலவரப்படி லித்தியத்தை அகழ்வாராய்ச்சி செய்து பதப்படுத்தும் தொழில்நுட்பம் இந்தியாவிடம் இல்லை.