ചൂടുവെള്ളം സൂര്യനിൽ നിന്ന്

ഒറ്റത്തവണ ഇൻവെസ്റ്റ്മെന്റ് ആണ് സോളർ വാട്ടർ ഹീറ്ററിന്റെ പ്രത്യേകത. ആ തുക മുടക്കുന്നത് അല്പം ചിന്തിച്ചായിരിക്കണം.

പ്രായമായവരോ കുട്ടികളോ അസുഖമുള്ളവരോ ഇല്ലാത്ത വീടുകൾ ഉണ്ടാകില്ല. അതു കൊണ്ടുതന്നെ തീർച്ചയായും വാട്ടർ ഹീറ്റർ ഒഴിവാക്കാനാകാത്ത ഘടകമാണ്. വാട്ടർ ഹീറ്റർ വാങ്ങാനുള്ള ചെലവ് കൂടാതെ, മാസാമാസം വൈദ്യുതി ബില്ല് അടയ്ക്കുന്നതിലും നല്ലത് ഒറ്റത്തവണ ഇൻവെസ്റ്റ് ചെയ്യുന്നതല്ലേ? സോളർ വാട്ടർ ഹീറ്റർ എന്ന സാധ്യതയിലേക്ക് മിക്കവരും തിരിയുന്നതിനു കാരണം ഇതാണ്. സോളർ വാട്ടർ ഹീറ്റർ തിരഞ്ഞെടുക്കുന്നതിനു മുൻപ് ചില കാര്യങ്ങൾ മനസ്സിലാക്കുന്നതു നല്ലതാണ്.

ഇടിസിയോ എഫ്പിസിയോ?

സോളർ വാട്ടർ ഹീറ്റർ രണ്ട് തരത്തിലുള്ളവയുണ്ട്. ഇടിസിയും (Evacuated Tube Collector) യും എഫ്പിസിയും (Flat Plate Collector).

സോളർ പാനലിന്റെ വ്യത്യാസം കൊണ്ട് ഈ രണ്ട് ടൈപ്പിനെയും ഒറ്റനോട്ടത്തിൽ തിരിച്ചറിയാം. കുഴലുകൾ പോലുള്ള സോളർ പാനലാണ് ഇടിസിക്ക്. പരന്ന സോളർ പാനൽ എഫ്പിസിയുടെ പ്രത്യേകതയാണ്. ഇവ തമ്മിൽ ഗുണമേന്മയിലും വിലയിലും കാര്യമായ വ്യത്യാസമുണ്ട്.

ചെലവ് കുറവാണ് ഇടിസിയുടെ ആകർഷണീയത. ചെലവ് ഇരട്ടിയോളം വരുമെങ്കിലും അറ്റകുറ്റപ്പണികൾ ഇല്ലാതെ ദീർഘ നാൾ നിൽക്കുമെന്നതാണ് എഫ്പിസിക്ക് ആരാധകരെ ഉണ്ടാക്കുന്ന കാര്യം.