ആവേശം അമ്പാൻ

'ആവേശ'ത്തിലെ അമ്പാനെ അവതരിപ്പിച്ച് കൈയടി നേടിയ സജിൻ ഗോപു വലിയ ആവേശത്തിലാണ്. സജിന്റെ സിനിമ വിശേഷങ്ങളിലേക്ക്...

- എസ്. ആനന്ദ് രാജ്

മലയാള സിനിമയിൽ ആവേശം നിറച്ച രംഗക്ക് ഒപ്പം നിറഞ്ഞാടിയ അമ്പാൻ എന്ന കോമിക് ഗുണ്ടയെ അവതരിപ്പിച്ച് തിയറ്ററുകളെ ഇളക്കിമറിച്ച് കൈയടി നേടിയ സജിൻ ഗോപു 'ആവേശം' നൽകിയ വൻ വിജയത്തിന്റെ ആവേശത്തിലാണ്.

'ചുരുളിയിൽ ജീപ്പ് ഡ്രൈവറായും 'ജാൻ എ. മനിലെ സജിയണ്ണനായും 'രോമാഞ്ചത്തിലെ നിരൂപ് ആയും എത്തി വിസ്മയിപ്പിച്ച സജിൻ ഗോപു അഭിനയിച്ച ഏതാണ്ട് എല്ലാ സിനിമകളും ഹിറ്റാണ്. സിനിമ വിശേഷങ്ങൾ 'കുടുംബവുമായി പങ്കുവെക്കുകയാണ് അദ്ദേഹം.

ആവേശം തിയറ്ററിൽ കണ്ടതിന്റെ ത്രിൽ

2024 മലയാള സിനിമയുടെ ഭാഗ്യവർഷമാണ്. പല സിനിമകളും നൂറും 150ഉം കോടി കലക്ട് ചെയ്തു. അവക്കൊപ്പം നമ്മുടെ സിനിമയും നിറഞ്ഞ സദസ്സിൽ കാണുമ്പോൾ സന്തോഷം തോന്നുന്നു. കഴിഞ്ഞ തവണയും വിഷുവിന് സിനിമ കാണാൻ പോയിരുന്നു. ഇത്തവണ അത് സ്വന്തം സിനിമയായ തിന്റെ ത്രില്ലുണ്ട്.

"രോമാഞ്ചം' റിലീസാകുന്നതിന് മുമ്പാണ് ആവേശം ഓൺ ആകുന്നത്. ജിത്തു മാധവൻ എന്നോട് പറഞ്ഞത് എന്റെ കാരക്ടർ ആണ് ഈ സിനിമയിൽ ആദ്യം കാസ്റ്റ് ആയതെന്നാണ്. ഞാൻ ഇതറിയുന്നത് പിന്നീടാണ്. 'രോമാഞ്ച'ത്തിന്റെ ഷൂട്ടിങ്ങിനിടെ പല സബ്ജക്ടുകൾ സംസാരിച്ചതിനിടെ 'ആവേശ'ത്തെക്കുറിച്ചും സംസാരിച്ചിരുന്നു. അന്നേ ഇതിൽ ഇന്ററസ്റ്റഡായിരുന്നു. "രോമാഞ്ച'ത്തിന്റെ റിലീസിങ്ങിനിടെയാണ് 'ആവേശ'ത്തിന്റെ പ്രീ പ്രൊഡക്ഷൻ വർക്കുകൾ ആരംഭിക്കുന്നത്. അന്ന് ടിനു പാപ്പച്ചന്റെ 'ചാവേർ സിനിമ ചെയ്തു കൊണ്ടിരിക്കുകയായിരുന്നു. അങ്ങനെ 'ആവേശ'ത്തിൽ ഇൻ ആയി. പിന്നീട് എട്ടുമാസത്തോളം ബംഗളൂരുവിലായിരുന്നു. പലപല ഷെഡ്യൂളുകളായാണ് ചെയ്തത്.

ജിത്തു മാധവന്റെ രണ്ടു സിനിമകളിലും അഭിനയിക്കാൻ സാധിച്ചു. അങ്ങനെ പ്രേക്ഷകർ ഇഷ്ടപ്പെട്ട രണ്ട് കമേഴ്സ്യൽ സിനിമയുടെ ഭാഗമാകാൻ സാധിച്ചു.

ഇനി നായകൻ

ഞാൻ നായകനാകുന്ന ജിത്തുവിന്റെ ചിത്രത്തെക്കുറിച്ച് ചർച്ചകൾ നടക്കുന്നുണ്ട്. അത് ചോദ്യചിഹ്നംപോലെ നിൽക്കുകയാണ്. കൂടുതൽ പറയാറായിട്ടില്ല. അടുത്തുതന്നെ അനൗൺസ് ചെയ്തേക്കും.

റിലീസിങ്ങിന് കാത്തിരിക്കുന്നത് ബേസിൽ ജോസഫിന്റെ സിനിമയാണ്. ജ്യോതിഷ് ശങ്കറാണ് സംവിധാനം. ഓണത്തിനായിരിക്കും റിലീസിങ്. പുതിയ രണ്ട് മൂന്ന് പ്രോജക്ടുകളുടെ ചർച്ചകൾ നടക്കുന്നുണ്ട്.