സ്വപ്ന തുല്യം കർഷക ജീവിതം

നൊമ്പരത്തിന്റെ ചാരത്തിൽനിന്ന് ഫിനിക്സ് പക്ഷിയെപോലെ പറന്നുയർന്ന് കഠിനാധ്വാനത്തിലൂടെ കൃഷിയിൽ മികച്ച വിജയം കൊയ്ത സ്വപ്ന കല്ലിങ്കൽ എന്ന വീട്ടമ്മയുടെ ജീവിതത്തിലേക്ക്...

- കെ.ആർ. ഔസേഫ്

ബംഗളൂരുവിൽ മലയാളി ബിസിനസ് കുടുംബത്തിൽ ജനിച്ചുവളർന്ന സ്വപ്നയുടെ മനസ്സിൽ ഒരിക്കൽ പോലും കൃഷിയുണ്ടായിരുന്നില്ല. വിവാഹിതയായി തൃശൂരിലെ കർഷക കുടുംബത്തിലെത്തിയെങ്കിലും കൃഷി കൗതുകമായി തുടർന്നു. അകാലത്തിൽ പ്രിയതമൻ വിടപറഞ്ഞതോടെ തനിച്ചായ സ്വപ്നക്ക് കൂട്ടായി ഉണ്ടായിരുന്നത് അദ്ദേഹം ബാക്കിവെച്ച കൃഷിയായിരുന്നു.

പ്രിയതമൻ തന്നോടൊപ്പമുണ്ടെന്ന ഉറച്ച വിശ്വാസത്തിൽ അവർ കൃഷിയിടത്തിലിറങ്ങി. കൃഷിയുടെ ബാലപാഠങ്ങൾ പോലും വശമില്ലാതിരുന്ന ആ യുവതി ഇന്ന് 35 ഏക്കറോളം കൃഷിഭൂമി നോക്കി നടത്തി തെന്നിന്ത്യയിലെ തന്നെ മികച്ച വനിത കർഷകരിലൊരാളായിരിക്കുന്നു. നൊമ്പരത്തിന്റെ ചാരത്തിൽ നിന്ന് ഫിനിക്സ് പക്ഷിയെപ്പോലെ പറന്നുയർന്ന സ്വപ്ന കല്ലിങ്കലിന്റെ കാർഷിക ജീവിതമിതാ...

കച്ചവട കുടുംബത്തിൽനിന്ന് കാർഷിക കുടുംബത്തിലേക്ക് ബംഗളൂരുവിലെ കുട്ടിക്കാലത്തിനു ശേഷം തൃശൂർ വിമ ല കോളജിൽ സ്വപ്ന ഡിഗ്രിക്ക് ചേർന്നു. തുടർന്ന്, എം.കോം പഠനം പൂർത്തിയാക്കി കമ്പ്യൂട്ടർ സയൻസിൽ ബിരുദം. ഇതിനിടെയാണ് തൃശൂർ പട്ടിക്കാട് ചാണോത്ത് കല്ലിങ്കൽ വീട്ടിൽ സിബിയുമായുള്ള വിവാഹം.

കോട്ടയം പാലാ ചക്കംകുളം വീട്ടിൽ തോമസും ഭാര്യ സൂസിയും മക്കളായ സ്വപ്നയും സന്ധ്യയുമടങ്ങുന്ന കൊച്ചുകുടുംബം. ബംഗളൂരുവിലെ ബിസിനസ് അവസാനിപ്പിച്ച് നാട്ടിലേക്ക് മടങ്ങുന്നതിന്റെ ഭാഗമായാണ് മക്കളെ കേരളത്തിലേക്ക് വിവാഹം കഴിപ്പിച്ചത്. പിന്നീട് പാലക്കാട്ട് 12 ഏക്കർ കൃഷിയിടം വാങ്ങി സ്വസ്ഥമായി നാട്ടിൽ കൂടുകയായിരുന്നു.

സ്വപ്ന തൃശൂരിലേക്ക് വരുമ്പോൾ തന്നെ സിബിയുടെ അപ്പച്ചൻ വർഗീസ് പട്ടിക്കാട് ചാണോത്തെ അറിയപ്പെടുന്ന കർഷകനായിരുന്നു. തൊടുപുഴയിൽനിന്ന് കുടിയേറിയ വർഗീസിന്റെ സഹോദരന്മാരും പട്ടിക്കാടും പരിസരങ്ങളിലുമായി കൃഷിയുമായി കൂടി.

സിബി എന്ന കർഷകൻ

ബിസിനസ് കുടുംബത്തിൽനിന്ന് കർഷക കുടുംബത്തിലെത്തിയ സ്വപ്നക്ക് കൃഷിയുടെ ബാലപാഠങ്ങൽ പോലും വശമില്ലായിരുന്നു. വീടിന്റെ ചുമരുകൾക്കുള്ളിൽ സിബിയുടെ ലോകത്ത് പൂന്തോട്ടം നോക്കിയും വളർത്തുമൃഗങ്ങളെ പരിപാലിച്ചും കഴിഞ്ഞുകൂടി. സിബിയും അപ്പൻ വർഗീസും ചേർന്ന് 15 ഏക്കർ പറമ്പിൽ കൃഷിയിൽ ലയിച്ച് ജീവിതം മുന്നോട്ടു കൊണ്ടുപോയി. പതുക്കെ അപ്പൻ കൃഷിയുടെ ചുമതല സിബിയെ എല്പിച്ചതോടെ കൂടുതൽ മികച്ച രീതിയിൽ കൃഷിചെയ്യാനും പുത്തൻ പ്രവണതകൾ സ്വന്തം തോട്ടത്തിൽ പരീക്ഷിച്ച് വിജയിപ്പിക്കാനും സിബിക്ക് കഴിഞ്ഞു.