മഞ്ഞപ്പടയുടെ Twinkling stars

കേരള ബ്ലാസ്റ്റേഴ്സിന്റെ ഇരട്ടക്കൊമ്പുകളായ ഇരട്ട സഹോദരങ്ങൾ മുഹമ്മദ് ഐമന്റെയും മുഹമ്മദ് അസ്ഹറിന്റെയും വിശേഷങ്ങളിതാ...

- ടി.കെ. ഷറഫുദ്ദീൻ

കാഴ്ചയിൽ തിരിച്ചറിയാനാകാത്ത സാമ്യമുള്ള ഇരട്ട സഹോദരങ്ങൾ. ലക്ഷദ്വീപിന്റെ കടലിരമ്പം കേട്ടാണ് അവർ വളർന്നത്. ചെറുപ്പം മുതൽ കാൽപന്തുകളിയോട് അടങ്ങാത്ത പ്രണയം. മക്കളുടെ തുകൽപന്തിനോടുള്ള ഇഷ്ടത്തിന് വളംവെച്ചുകൊടുത്ത് ഒപ്പം നിന്ന മാതാപിതാക്കൾ. പതിയെ ലക്ഷ്യത്തിലേക്ക് പന്തുതട്ടിയ അവർ ഇന്ന് ഐ.എസ്.എൽ ടീം കേരള ബ്ലാസ്റ്റേഴ്സിന്റെ ഇരട്ട എൻജിനുകളാണ്.

എതിരാളികളുടെ ബോക്സിലേക്ക് ഇരമ്പിയെത്തി ഒരാൾ ഗോൾ അടിച്ചുകൂട്ടുമ്പോൾ മറ്റൊരാൾ വിജയത്തിലേക്കുള്ള കില്ലർ പാസുകൾ നൽകി കളം നിറയുന്നു. പച്ച പുൽ മൈതാനങ്ങളിൽ കൊമ്പന്മാരുടെ ഇരട്ടക്കൊമ്പുകളായ മുഹമ്മദ് ഐമന്റെയും മുഹമ്മദ് അസ്ഹറിന്റെയും വിശേഷങ്ങളിലേക്ക്...

ഫുട്ബാളിലേക്കുള്ള വരവ്

ലക്ഷദ്വീപ് ആന്ത്രോത്ത് സ്‌കൂൾ മൈതാനത്ത് പന്തുതട്ടിയായിരുന്നു ഇരുവരുടെയും തുടക്കം. വിവിധ ക്ലബ് മത്സരങ്ങളിൽ കളിച്ചു. ഫുട്ബാളിനെ പ്രഫഷനലായി കണ്ടുതുടങ്ങിയത് കൊച്ചിയിലെത്തിയത് മുതലായിരുന്നു. 12-ാം വയസ്സ് മുതൽ പരിശീലകൻ രവിക്ക് കീഴിൽ എസ്.എച്ച് ഫുട്ബാൾ അക്കാദമിയിൽ കളി പഠിച്ചുതുടങ്ങി. ഐമൻ വിങ്ങറും ഫോർവേഡുമായി കളം നിറയുമ്പോൾ അസ്ഹർ മിഡ്ഫീൽഡറായി പ്ലേമേക്കർ റോളിൽ തിളങ്ങി. തുടർന്ന് ബേബിക്ക് കീ ഴിൽ സ്പോർട്സ് കൗൺസിലിൽ പരിശീലനം. പിന്നീടാണ് കേരള ബ്ലാസ്റ്റേഴ്സിന്റെ ഗ്രാസ് റൂട്ട് പ്രോഗ്രാമിന്റെ സെലക്ഷൻ ലഭിക്കുന്നത്.

സംസ്ഥാനതലത്തിലേക്ക് തിരഞ്ഞെടുക്കപ്പെട്ടതോടെ തലവര മാറി. കേരള ബ്ലാസ്റ്റേഴ്സിന്റെ അണ്ടർ 15 ട്രയൽസിലൂടെ യുവ നിരയിലേക്ക്. പിന്നീട് ബ്ലാസ്റ്റേഴ്സ് അണ്ടർ 18, റിസർവ് ടീമുകളുടെ ഭാഗമായി. റിസർവ് ടീമിലെ മിന്നും പ്രകടനം ഇരുവരെയും അതിവേഗം സീനിയർ തലങ്ങളിലെത്തിച്ചു. ബ്ലാസ്റ്റേഴ്സ് സീനിയർ ടീമിൽ ആദ്യം കളിച്ചത് ഡ്യൂറന്റ് കപ്പിലായിരുന്നു.

ബ്ലാസ്റ്റേഴ്സ് എന്ന സ്വപ്നം

കേരള ബ്ലാസ്റ്റേഴ്സിനൊപ്പം കളിക്കുകയെന്നത് ഞങ്ങളുടെ വലിയ സ്വപ്നമായിരുന്നെ ന്ന് ഐമൻ പറയുന്നു. സീനിയർ താരങ്ങൾക്കൊപ്പം ഡ്രസിങ് റൂം പങ്കിടുകയെന്നതും അവർക്കൊപ്പം മൈതാനത്ത് പന്ത് തട്ടുകയെന്നതും വലിയ അനുഭവമാണ്. അക്കാദമിയിൽ കളിക്കുന്ന ഏതൊരു താരത്തിന്റെയും ആഗ്രഹമാണിത്.