માના પટેલ – ઝીલ દેસાઈ: ગરવી ગુજરાતણો ખેલમાં પણ અગ્રસર છે, હોં!

હમણાં સંપન્ન થયેલા રાષ્ટ્રીય ખેલોત્સવમાં યજમાન ગુજરાતે અત્યાર સુધીના સર્વાધિક મેડલ જીતીને જે સપાટો બોલાવ્યો એમાં મહિલા ખેલાડીઓનું ઉલ્લેખનીય યોગદાન રહ્યું છે. એમના ઉજ્વળ દેખાવ અનેક ગુજરાતી કન્યા માટે પ્રેરણારૂપ બન્યા છે.

- નીકિતા શાહ

ભારતમાં રાષ્ટ્રીય રમતોત્સવને દેશી ઑલિમ્પિક્સ ગણવામાં આવે છે. ૨૯ સપ્ટેમ્બરથી ૧૨ ઑક્ટોબર સુધી ગુજરાતની ધરતી પર ૩૬મો રાષ્ટ્રીય રમતોત્સવ યોજાઈ ગયો. આ લખાય છે ત્યાં સુધીમાં ગુજરાતના સંઘે ૧૩ સુવર્ણ, ૧૩ રજત અને ૧૮ કાંસ્ય સહિત કુલ ૪૪ ચંદ્રકો જીત્યા છે. રમતોત્સવના ઈતિહાસમાં ગુજરાતનો આ શ્રેષ્ઠ અને ઝળહળતો દેખાવ બન્યો છે, કારણ કે સાત વર્ષ પહેલાં કેરળમાં યોજાઈ ગયેલી નૅશનલ ગેમ્સમાં ગુજરાતના ગુજરાતના ખેલાડીઓએ ૧૦ ગોલ્ડ સાથે કુલ ૨૦ ચંદ્રક જીત્યા હતા.

ઝીલ દેસાઈ

ગુજરાતની આ સિદ્ધિનું શ્રેય રાજ્યની અનેક મહિલા ખેલાડીની મહેનતને જાય છે, પરંતુ બે કન્યાનો પરફોર્મન્સ ઊડીને આંખે વળગ્યો છે. આ બે છે-સ્વિમર માના પટેલ અને ટેનિસ ખેલાડી ઝીલ દેસાઈ. ગુજરાત ગેમ્સમાં આ બન્ને સ્પર્ધકના દેખાવને કારણે દેશના ખેલકૂદ ક્ષેત્રે ગુજરાતનું નામ આદરથી લેવાતું થયું છે. માના અને ઝીલે પોતાની ગેમ્સમાં સુવર્ણ ચંદ્રક જીતતાં આંતરરાષ્ટ્રીય સ્તરે એશિયાડ અને ઑલિમ્પિક્સમાં દેશ આ બન્ને પાસેથી મેડલની આશા રાખી શકે છે.

બેક્સ્ટ્રોકની રાણી

બાવીસ વર્ષની માના પટેલ હાલ દેશની શ્રેષ્ઠ સ્વિમર ગણાય છે. ૨૦૨૧ની ટોક્યો ઑલિમ્પિક્સમાં ભાગ લેનારી એ એકમાત્ર ભારતીય મહિલા સ્વિમર હતી. સ્વિમિંગ શરૂ કર્યું ત્યારથી માના ઑલિમ્પિક્સનું સપનું જોતી હતી, જે ગયા વર્ષે સાકાર થયું. સ્થાનિક એકેડેમીમાં તો એ સ્વિમિંગની તાલીમ લઈ જ રહી હતી, પરંતુ ઑલિમ્પિક્સ સંઘમાં પસંદગી થવાને કારણે એને વિશેષ તાલીમ મળી, જેનાથી આત્મવિશ્વાસ વધ્યો અને તરવાની સ્પીડ પણ વધી.

૩૬મી ગુજરાત નૅશનલ ગેમ્સમાં માનાએ અપેક્ષા અને પ્રતિષ્ઠા પ્રમાણેનો દેખાવ કરતાં ૧૦૦ મીટર અને ૨૦૦ મીટર બૅકસ્ટ્રોકમાં બે ગોલ્ડ અને એક સિલ્વર મેડલ જીતી લીધા. ૧૦૦ મીટરમાં ૧૪.૩૫ સેકન્ડ તથા ૨૦૦ મીટર બૅકસ્ટ્રોકમાં ૨:૧૯.૭૪ સેકન્ડના નવા રાષ્ટ્રીય વિક્રમ એણે રચ્યા. ૨૦૦ મીટર હરીફાઈમાં અગાઉનો બેસ્ટ દેખાવ માનાના જ નામે હતો-૨:૨૩.૨૧ સેકન્ડ, જે એણે ૨૦૧૫માં કેરળ ગેમ્સમાં નોંધાવ્યો હતો.