તડકે તપે એ બહુ ફળે..

ફળ-શાક કે ફૂલ આપતા મોટા ભાગના પ્લાન્ટ્સ સૂર્યપ્રકાશની હાજરીમાં જ સારું ઉત્પાદન આપે છે, પણ..

- પૂર્વી શાહ

આપણી માટી બની ગઈ છે, કૂંડું કે પાત્ર પણ પોટિંગ મિક્સ ભરીને તૈયાર થઈ ગયું છે એટલે આપણે ઉતાવળાં થઈ ગયાં હોઈશું પ્લાન્ટ ઉગાડવા માટે. અહીં જરા થોભો, કારણ કે આપણે જે પ્લાન્ટ ઉગાડવા ઈચ્છીએ છીએ એમાં ફ્લાવરિંગ થશે કે નહીં, ફ્રૂટ્સ લાગશે કે નહીં, લાગશે તો કેટલાં લાગશે, એની સાઈઝ કેવી હશે એ બધાનો અંદાજ સૂર્યપ્રકાશ અને જે-તે સ્થાનની આબોહવા (માઈક્રો ક્લાઈમેટ) જ આપી શકશે.

માઈક્રો ક્લાઈમેટનો સૌથી મહત્ત્વનો ઘટક એટલે સૂર્યપ્રકાશ. વનસ્પતિ સૂર્યપ્રકાશની હાજરીમાં ખાવાનું બનાવે છે એ તો આપણને સ્કૂલથી ભણાવવામાં આવે છે. વ્યવહારમાં આપણે નોંધ્યું જ હશે કે એક જ નર્સરીમાંથી ખરીદેલા બે રોપા ઘરમાં જુદી જુદી દિશામાં રાખીએ તો બન્નેનાં પરિણામમાં તફાવત રહે છે. આ તફાવત પાછળ સૂર્યપ્રકાશની તીવ્રતા મોટું કારણ છે. આપણે ઘરની બાલ્કની કે બારીની દિશા બદલી શકવાનાં નથી એટલે મહત્તમ ઉત્પાદન લેવા માટે સૂર્યપ્રકાશની તીવ્રતા સમજીને જ કૂંડાંની ગોઠવણી કરવી જોઈએ.