મિતલ સોજિત્રા: કલ્પનાનું કેન્વાસ-પુરુષાર્થની પીંછીથી કંડાર્યું સફળતાનું પોર્ટ્રેટ

સ્કૂલની બુકથી બહાર નીકળી એની ચિત્રકળા આજે સુરત, વડોદરા અને ઈન્દોરનાં બ્રિજ અને સડકોને સુશોભિત કરી રહી છે. સુરત, અમદાવાદ, વડોદરા, મુંબઈ મળીને ૧૩ જેટલાં સોલો પેન્ટિંગ એક્ઝિબિશન યોજનારી આ ચિત્રકાર અત્યારે તો વડા પ્રધાન નરેન્દ્ર મોદીની જીવનયાત્રાને લગતા એક મહત્ત્વાકાંક્ષી પેન્ટિંગ પ્રોજેક્ટ પર કામ કરી રહી છે.

- અરવિંદ ગોંડલિયા

એ શાળામાં ભણતી ત્યારે એનાં પાઠ્યપુસ્તકો અને નોટબુકનાં પાને પાને અવનવી ચિત્રકારી દેખાય. એ પુસ્તક કે નોટ પર સ્ટુડન્ટનું નામ જોયા વગર પણ શિક્ષક તરત બોલી ઊઠતા કે આ પુસ્તક મિતલનું છે. બાલિકા મિતલને ભણવામાં ખાસ રસ નહીં. રસ માત્ર ચિત્રો દોરવામાં. દિવસઆખો ચિત્રો દોર્યા કરે.

હવે, જો બાળપણમાં મિતલ ચિત્રકળાને આ હદે ચાહતી હોય તો મોટી થતાં એ કળા એને વહાલથી વરે એમાં શું નવાઈ? આવું જ થયું સુરતની આ ચિત્રકાર સાથે કળાના માધ્યમથી આજે એણે સફળતાનાં શિખર સર કર્યાં છે. વડા પ્રધાન નરેન્દ્ર મોદી પણ એનાં ચિત્રોથી પ્રભાવિત છે. મળો, સુરતની ચિત્રકાર મિતલ સોજિત્રાને.

અમરેલી જિલ્લાના નાના લીલિયા ગામમાં મૂળિયાં ધરાવતી મિતલનો જન્મ સુરતમાં. પિતા જયસુખભાઈ ડાયમંડના વ્યવસાય સાથે સંકળાયેલા, જ્યારે માતા કૈલાસબહેન ગૃહિણી. મધ્યમવર્ગી પરિવાર. બાલ્યાવસ્થામાં મિતલ હાથમાં પેન-પેન્સિલ આવી જાય તો ભીંત, ચોપડાં અને અનેક ચીજવસ્તુ પર આકાર વિનાનાં કૂંડાળાં દોરવા માંડે. એ કૂંડાળાં જોઈને કોઈએ વિચાર્યું નહોતું કે એ ભવિષ્યમાં સારી ચિત્રકાર બનશે.

કૅન્વાસથી આગળ વિસ્તરી છે કળાઃ કોરોના મહામારી સામેની જનજાગૃતિ ઝુંબેશને વાચા આપવાની હોય કે સુરત-વડોદરાના રસ્તા અથવા તો બ્રિજને આ રીતે રંગથી નવી ઓળખ આપવાની હોય, મિતલ બધે પહોંચી વળે.

જો કે પપ્પાએ એની કળા પારખી લીધી.

બન્યું એવું કે મિતલ પાંચમા ધોરણમાં હતી ત્યારે ગુજરાત સમાચાર અખબારની બાળકો માટેની પૂર્તિ ઝગમગની રંગપુરવણી સ્પર્ધામાં એ ચિત્રોમાં રંગ પૂરીને અખબારને મોકલતી અને પછીના અંકમાં એનો પહેલો નંબર આવે એની રાહ જોતી, પણ એની આશા હંમેશાં નિરાશામાં જ ઠરતી. આમ છતાં એ હિંમત હારતી નહીં. એક વાર પ્રથમ તો નહીં, પણ ત્રીજો નંબર જરૂર આવ્યો. નંબર મહત્ત્વનો નથી, પણ પ્રતિ સપ્તાહ કસરત થતી એનાથી એની કળા વધુ નીખરી. દીકરીને ડ્રોઈંગમાં રસ છે એ જાણી જયસુખભાઈએ ડ્રોઈંગ ટીચરનું ટ્યુશન ચાલુ કરાવ્યું. બે-ત્રણ વર્ષ ભણતાં ભણતાં ડ્રોઈંગ ક્લાસ ચાલ્યા.