આ તે કેવો ઝેરીલો, ડંખીલો પ્યાર?

છેલ્લા થોડા સમયથી પ્રેમસંબંધના કરુણ અંજામ જોવા મળી રહ્યા છે. હમણાં મુંબઈનો કિસ્સો ગાજે છે, જેમાં પુરુષે પોતાની સ્ત્રીમિત્રની લાશના ટુકડા કરી એને પ્રેશર કૂકરમાં બાફી દીધા.. શું છે આની પાછળનાં કારણ, શું કહે છે એક્સ્પર્ટ્સ?

- કેતન મિસ્ત્રી (મુંબઈ)

નવી દિલ્હીમાં રહેતાં સાહિલ-નિક્કી ચારેક વર્ષથી મજેથી લિવ-ઈન રિલેશનશિપ જીવતાં હતાં. એક દિવસ નિક્કીને ખબર પડી કે સાહિલની તો બીજી કોઈ કન્યા સાથે સગાઈ થઈ છે. બન્ને વચ્ચે આ મુદ્દે ઉગ્ર ચર્ચા થઈ. સાહિલે ચર્ચાનો અંત આણ્યો નિક્કીની હત્યા કરીને. ઠંડા કલેજે નિક્કીની હત્યા કરી લાશને પોતાની માલિકીની રેસ્ટોરાંના મોટા ફ્રિજમાં મૂકી સાહિલ લગ્નના માંડવામાં પરણવા બેસી ગયો. સાત ફેરા ફરીને લાશને કારની ડિકીમાં સંતાડી એને એક્સિડન્ટનું સ્વરૂપ આપવાની એની યોજના હતી, પણ વૅલેન્ટાઈન્સ ડેના રોજ (૧૪ ફેબ્રુઆરી, ૨૦૨૩) પડોશીને નિક્કીની ગેરહાજરી કઠતાં એણે પોલીસને જાણ કરી. પોલીસે સાહિલને ભીંસમાં લીધો. મુંબઈની શ્રદ્ધા વાલકરની નિવૃણ હત્યા દિલ્હીમાં એના લિવ-ઈન પાર્ટનર આફતાબે કરી એના થોડા જ સમય બાદનો આ કિસ્સો.

- અને નિક્કીની હત્યા થઈ એ જ સમયે મુંબઈમાં હાર્દિક શાહે પોતાની લિવ-ઈન પાર્ટનર મેઘાની હત્યા કરી. બન્ને ૧૪ ફેબ્રુઆરીએ વૅલેન્ટાઈન્સ ડે સેલિબ્રેટ કરવાનાં હતાં. ૧૩ ફેબ્રુઆરીએ ૨૭ વર્ષી હાર્દિક ૩૭ વર્ષી મેઘાની હત્યા કરી લાશને ઘરમાં બૉક્સ-બેડમાં સંતાડી દીધી. એ જ પલંગમાં એ પોઢી ગયો. બીજા દિવસે સવારે હાર્દિક મુંબઈમાંથી ભાગી છૂટ્યો. ચોવીસ કલાક બાદ લાશ મળતાં મુંબઈ પોલીસે ચક્રો ગતિમાન કર્યાં અને મધ્ય પ્રદેશમાં એની અરેસ્ટ થઈ.

અત્યારે મુંબઈમાં મનોજ સાને-સરસ્વતી વૈદ્યનો કિસ્સો ગાજી રહ્યો છે. ભલભલા કઠણ કાળજાની વ્યક્તિ પણ ભાંગી પડે એવી ઘટનાઃ ૫૬ વર્ષી મનોજ સાને પોતાની ૩૬ વર્ષની લિવ-ઈન પાર્ટનરની લાશના થોડા થોડા ટુકડા પ્રેશર કૂકરમાં બાફવા મૂકતો. પોલીસે મનોજને પકડી એની પૂછપરછ કરી તો એણે એવું કહ્યું હોવાનું મનાય છે કે ‘૩ જૂને મેં સરસ્વતીને ઘરમાં મૃત પડેલી જોઈ. એના મોંમાંથી ફીણ નીકળી રહ્યાં હતાં. હું ગભરાઈ ગયો એટલે એની લાશને ઠેકાણે પાડવાનું નક્કી કર્યું.’

સરસ્વતી વૈદ્યની લાશના ટુકડા કરી પ્રેશર કૂકરમાં બાફનારો નરાધમ મનોજ સાને પોલીસની પકડમાં.. આ બિલ્ડિંગમાં બન્ને રહેતાં હતાં.