શું તમે માતૃત્વની તૈયારી કરી રહ્યાં છો?

તંદુરસ્ત ગર્ભાવસ્થાની શરૂઆત માટે જરૂરી છે આટલી તકેદારી.

- ડૉ. અર્ચના પારસ શાહ

આપણા સહિત અનેક સમાજ કોઈ પણ મહિલાના જીવનમાં માતૃત્વ ધારણ કરવાને બહુ મહત્ત્વ આપે છે. ગર્ભધારણ એ જીવનનો સૌથી આનંદદાયક અને રોમાંચક અનુભવ છે એ સાચું, પરંતુ એ સાથે સ્ત્રીની જીવનશૈલીમાં આમૂલ પરિવર્તન પણ થાય છે. આપણે જાણીએ જ છીએ કે ગર્ભાવસ્થા દરમિયાન એવી ઘણી બાબત સંકળાયેલી છે, જેની તકેદારી રાખવી આવશ્યક બની જાય છે.

જો કે આજે આ કૉલમમાં ગર્ભધારણ કરતાં અગાઉ રાખવાની કાળજી વિશે આપને જણાવવું છે. તમારા બાળકની સંભાળ જન્મના ઘણા સમય પહેલાંથી શરૂ કરવી જોઈએ. વાસ્તવમાં એ ક્ષણથી શરૂ થવી જોઈએ જ્યારે તમે નક્કી કરો કે તમે બાળકને જન્મ આપવા માગો છો, કારણ કે દરેક સગર્ભાવસ્થા પોતાની રીતે અજોડ છે. બાળજન્મ માટે આયોજન કરતી વખતે તમારે ઘણું અગાઉથી શીખવું પડશે. ગર્ભાવસ્થા દરમિયાન સારી પ્રિનેટલ કૅર અને તબીબી સારવાર મોટા ભાગની ગૂંચવણોને રોકવામાં મદદ કરે છે. આ લેખમાં અપાયેલી વિગત તમને તંદુરસ્ત પસંદગીના વિકલ્પો પૂરા પાડશે.

સ્ત્રી માટે સૌથી પ્રથમ અને ઉપયોગી પ્રેગ્નન્સી પ્લાનિંગ ઍક્ટિવિટીમાંની એક એટલે ગાયનેકોલૉજિસ્ટ સાથે પ્રેગ્નન્સી રાખવા પહેલાંની કાળજીની ચર્ચા. ગાયનેકોલૉજિસ્ટ સગર્ભાવસ્થા પહેલાં સ્ત્રી અને એના પરિવાર તથા પતિ અને એના પરિવારનો સંપૂર્ણ ઈતિહાસ ચકાસશે, જેથી સ્ત્રી કે ગર્ભને ખરાબ અસર કરી શકે એવાં કોઈ પણ પરિબળ, આનુવંશિક ખામી સહિતની બીમારી અથવા પ્રિ-ટર્મ ડિલિવરીના જોખમની સંભાવના જાણી શકાય.