આવાં કેટલાં સપનાં રોજ મરે છે!

ભણેશ્રીઓની નગરી તરીકે એક જમાનામાં જેની ઓળખ હતી એ રાજસ્થાનનું કોટા અત્યારે ખંડિત શમણાં અને આપઘાતનું નગર બની રહ્યું છે.

ભણેશ્રીઓની નગરી તરીકે એક જમાનામાં જેની ઓળખ હતી એ રાજસ્થાનનું કોટા અત્યારે ખંડિત શમણાં અને આપઘાતનું નગર બની રહ્યું છે. પાછલા ત્રણ-ચાર મહિનામાં અહીં વીસથી વધુ વિદ્યાર્થીએ આપઘાત કર્યો હોવાનું આંકડા બોલે છે. હતાશાને કારણે જીવતર રોળાઈ ગયું હોય એવા કિસ્સા તો અસંખ્ય હશે.

કોટા એના ઢગલાબંધ કોચિંગ ક્લાસ અને ત્યાં દેશના ખૂણે ખૂણેથી ભણવા આવતા હજારો વિદ્યાર્થીઓને કારણે જાણીતું છે. આઈઆઈટી જેવી પ્રતિષ્ઠિત શૈક્ષણિક સંસ્થામાં પ્રવેશ મેળવવા આશાસ્પદ વિદ્યાર્થીઓને વ્યવસ્થિત તાલીમ આપવાના ઉદ્દેશથી ૧૯૮૦ના દાયકામાં કોટામાં પહેલવહેલા કોચિંગ ક્લાસ ખૂલ્યા અને શરૂઆતમાં એ પ્રયોગ ઠીક ઠીક સફળ પણ રહ્યો. વર્ષ-પ્રતિ વર્ષ કોટાના કોચિંગ ક્લાસના અમુક વિદ્યાર્થીઓને આઈઆઈટીમાં ઍડ્મિશન મળતું એમાં તો આ શહેરનું નામ થઈ ગયું અને એ સાથે કોટા આવા પ્રવેશ-ઉત્સુક નવલોહિયાઓ તૈયાર કરતી ફૅક્ટરી બનતું ગયું.