આધુનિક જીવનશૈલીનાં આધુનિક ભયસ્થાન

કૅન્સરના કેસ વધી રહ્યા છે તો દરદી સાજા થવાનું પ્રમાણ પણ ખાસ્સું વધ્યું છે.

માત્ર ૨૮ વર્ષની વયે એમબીબીએસ, એમડી, ડીએમ (ડૉક્ટરેટ ઑફ મેડિસિન) ડિગ્રી મેળવનારા ડૉ. પાર્થ કરમટા કદાચ ગુજરાતના સૌથી યુવા ઑન્કોલૉજિસ્ટ હશે. મૂળ રાજકોટના, પણ મુંબઈમાં પ્રેક્ટિસ કરતા તથા ઑલ ઈન્ડિયા ઈન્સ્ટિટ્યૂટ ઑફ મેડિકલ સાયન્સિસ (એઈમ્સ) જેવી કેટલીક સુપરસ્પેશિયાલિટી હૉસ્પિટલ્સ સાથે સંકળાયેલા ડૉ. પાર્થ કરમટા ચિત્રલેખાને કહે છે: ‘મેડિકલ સાયન્સ આજે એ હદે આગળ વધી ગયું છે કે કૅન્સર એટલે (લાઈફ) કૅન્સલ એ વાક્ય હવે ભૂતકાળ બની જશે.’

થોડા જ સમય પહેલાં વડા પ્રધાન નરેન્દ્ર મોદીના હાથે જેમનું કૉન્વોકેશન થયું એ ડૉ. પાર્થ આમ તો બધા જ પ્રકારનાં જટિલ કૅન્સરના કેસ ટ્રીટ કરે છે, પણ એમની વિશેષતા છે લ્યુકેમિયા અને છેલ્લા તબક્કાની પડકારરૂપ સારવાર, જેમ કે થોડા સમય પહેલાં એમણે તાજા જન્મેલા શિશુના લ્યુકેમિયાની ટ્રીટમેન્ટ કરી. હાલ, એ સ્વસ્થ છે.

ડૉ. પાર્થ કરમટા: રેડિયેશન અને પેસ્ટિસાઈડથી લથબથ ખોરાક કૅન્સર થવાનાં મોટાં કારણ છે.

કૅન્સર સારવારની લેટેસ્ટ ટેક્નિક વિશે એ કહે છેઃ ‘છેલ્લા થોડા સમયથી ટાર્ગેટ સેલ થેરાપી અસરકારક નીવડી રહી છે. વાચકો માટે સાવ સરળ શબ્દોમાં કહીએ તો, ટાર્ગેટ સેલ થેરાપી એટલે કૅન્સરના કોષોને લક્ષ બનાવી એને નષ્ટ કરતી ટ્રીટમેન્ટ.'

એ કહે છેઃ ‘ધારો કે તમારા કમ્પ્યુટરમાં પરેશ નામથી ૧૪૦ વ્યક્તિની માહિતી છે, પણ તમે અત્યંત જરૂરી એવા ચાર-પાંચ પરેશને શોધી બાકીનાને બાજુએ મૂકી દો એમ ટાર્ગેટ સેલ થેરાપીમાં પણ જે શરીર માટે જીવલેણ છે એવા કૅન્સર સેલ્સને શોધીને નષ્ટ કરવામાં આવે છે. આ થેરાપીનો ફાયદો એ કે એ બીજા સારા કોષોને હાનિ પહોંચાડતી નથી તથા કોઈ આડઅસર નથી. કહી શકાય કે કેમોથેરાપી પછીની ૧૦મી જનરેશન છે ટાર્ગેટ સેલ થેરાપી. આ ઉપરાંત, કેટલાંક ઈન્જેક્શન્સ પણ ઉપલબ્ધ છે, જેનો સક્સેસ રેટ ૯૦-૯૫ ટકા છે.’

શું કૅન્સર એ વારસાગત બીમારી છે?

જવાબમાં ડૉ. પાર્થ કરમટા કહે છેઃ ‘ઘણી વાર પાનમસાલા-ધૂમ્રપાનથી આપણે જોઈએ છીએ કે સદા દૂર રહેનારી તંદુરસ્ત વ્યક્તિને પણ કૅન્સર થઈ જાય છે. બની શકે કે એના દાદા, પરદાદા હુક્કો-ચલમના બંધાણી હોય, પણ ડીએનએનું મ્યુટેશન થતાં એક-બે પેઢી પણ વીતી જાય.’