બસ કરે છે આ બસ..

વેસ્ટિબ્યુલ ટ્રૉલી બસ અને સાદી ડબલ ડેકરની વિદાય.. હવે સવારી માટે છે એસી ડબલ ડેકર બસ.

બા રિટાયર થાય છે. એ નાટકે ઘણાની આંખમાં પાણી લાવી દીધેલાં. હવે મુંબઈગરાઓની આંખ એમની પ્રિય લાલ પરી અર્થાત્ ડબલ ડેકર બસોને રિટાયર કરવામાં આવી એથી ભીંજાઈ ગઈ છે. તમે સમાચારમાં વાંચ્યું હશે કે ૧૯૩૭થી ચાલતી મુંબઈની ડબલ ડેકર બસોને હમણાં બેસ્ટ કંપનીએ સેવાનિવૃત્ત કરી દીધી. એક કાળે મુંબઈની રસ્તા પર લાલ રંગની ૯૦૦ ભીમકાય બસો દોડતી. નોકરિયાતો માટે એ સમયસર કામે પહોંચવાનું વાહન હતી તો સ્કૂલનાં બાળકો માટે એ ધિંગામસ્તીનું સાધન હતી.

ઉપલા માળે સામસામેની બે સીટમાં બેસવા માટે રીતસર બાળકો દોટ મૂકતાં. અમે નાનાં હતાં ત્યારે આ આગલી સીટમાં બેસીને ડ્રાઈવરની અદાથી બસ ચલાવવાની ઍક્ટિંગ કરતાં. એ વખતે મોબાઈલ હોત તો એવી ૧૦૦-૨૦૦ સેલ્ફી પણ લઈ લીધી હોત.

ખેર, અનેક કૉલેજિયનો એમના પ્રિય પાત્રની ઝલક મેળવવા માટે અમથા જ ડબલ ડેકરમાં ચઢી જતા. આ બસમાં નિયમિત પ્રવાસ કરનારા કેટલાક લોકો પ્રેમમાં પડીને પરણી ગયાના પણ દાખલા છે. અહીં નામ લખીને એમને લજ્જિત નહીં કરું, પણ અમિતાભ ને શશી કપૂર અનુક્રમે પરવીન બાબી અને બિંદિયા ગોસ્વામી પાસે પ્રેમનો એકરાર ડબલ ડેકર બસમાં જ કરાવે છે એવું શાન ફિલ્મમાં દેખાડ્યું છે.