પારકી આફત ગળે ન બાંધી એમાં ખોટું શું છે?

ગાઝા પટ્ટી પરના ઈઝરાયલના પ્રતિ-આક્રમણ સામે ‘સંયુક્ત રાષ્ટ્રસંઘ’ના ઠરાવને ટેકો ન આપી ભારતે કોઈ અપરાધ કર્યો નથી. કબૂલ કે આ હુમલામાં નિર્દોષ પ્રજાને ભાગે જ વધુ સહન કરવાનું આવશે, પણ ભારત પર પાકિસ્તાન નિરંતર આતંકી હુમલા કરતું હતું ત્યારે માનવતાની વાત કરનારા ક્યાં હતા? એ સમયે કયા દેશમાં ત્રાસવાદની વિરુદ્ધમાં લોકો રસ્તે ઊતર્યા હતા?

- હીરેન મહેતા

જગતના અડધા ઉપરાંતના દેશોની તમા રાખ્યા વગર ઈઝરાયલ એનું વેર વાળવા પેલેસ્ટિનના વર્ચસ હેઠળની ગાઝા પટ્ટીમાં લશ્કર ઘૂસેડી રહ્યું છે. અત્યાર સુધીમાં આઠ હજારથી વધુ લોકોનાં મોતના વાવડ છે અને મરણનો આંકડો ક્યાં જઈને અટકશે એ વિશે કોઈ કહી શકે એમ નથી. સાત ઑક્ટોબરની સવારે ગાઝા પટ્ટી પરથી થયેલા હુમલામાં ૧૪૦૦ નાગરિકોના જાન ગુમાવ્યા પછી ઈઝરાયલ પોતાના પ્રતિકારમાં જરાય નરમાશ દેખાડે એવી અપેક્ષા રાખવી જ ખોટી છે. કોઈને લાફો મારનારે સામે તમાચો ખાવાની તૈયારી રાખવાની જ હોય.

સંયુક્ત રાષ્ટ્રસંઘ (યુનો)ની મહાસભાએ હમણાં માનવતાના નામે ગાઝા પટ્ટી વિસ્તારમાં ઈઝરાયલી સેનાની કારવાઈ રોકવાને લગતો ઠરાવ પસાર કર્યો છે. આ ઠરાવ ભલામણ કે સૂચનના રૂપમાં છે અને ઈઝરાયલ માટે બંધનકર્તા નથી. બંધનકર્તા હોત તો પણ ઈઝરાયલે એ ઠરાવનું પાલન કર્યું હોત એમ માની શકાય નહીં. ધારણા પ્રમાણે જ ઈઝરાયલ સાથે અમેરિકાએ આ પ્રસ્તાવનો વિરોધ કર્યો તો અત્યારે અમેરિકા સામે ચોકો માંડી બેસેલા રશિયા અને ચીને લગભગ બધા જ મુસ્લિમ દેશો સાથે એ ઠરાવના સમર્થનમાં મતદાન કર્યું. દોઢ-પોણા બે વરસ અગાઉ આ જ રશિયાએ યુક્રેન પર આક્રમણ કર્યું હતું અને એ બે વચ્ચેનું યુદ્ધ હજી ચાલે છે. હવે રશિયા ઈઝરાયલને શિખામણ આપવા નીકળ્યું છે અને ઈચ્છે છે કે  ગાઝા પટ્ટીમાંથી ઈઝરાયલ એનું સૈન્ય પાછું બોલાવી લે!

‘હમસ’નું નામ લીધા વગર ઈઝરાયલના માઝા પટ્ટી પરના આક્રમણને માનવતાના ધોરણે રોકવાનું પગલું વાજબી કહેવાય? ઈઝરાયલ લીધું વેણ છોડશે નહીં એટલે પેલેસ્ટિનની પ્રજાએ હજી વધુ ખુવારી માટે તૈયાર રહેવું પડશે.