આટઆટલા આતંકીઓને એમના જ ઘર પાકિસ્તાનમાં મારે છે કોણ?

ભારતમાં અત્યાર સુધી થયેલા અનેક હુમલામાં સંડોવાયેલા વીસ જેટલા ત્રાસવાદી છેલ્લા વરસેકમાં માર્યા ગયા છે. જો કે એમના ખાતમા માટે આપણી ગુપ્તચર એજન્સી કરતાં ખુદ પાકિસ્તાન સામે જ આંગળી ઊઠે છે.

- હીરેન મહેતા

નામાલૂમ અફરાદ...

આ નામની એક પાકિસ્તાની કૉમેડી ફિલ્મ છે, પણ આપણે વાત એ ફિલ્મની નથી કરવી. ના માલૂમ અફરાદનો અર્થ થાય કોઈક અજાણ્યા માણસો, જેમની કોઈ ઓળખ નથી, અતોપતો નથી, એમના વિશે કોઈ જ માહિતી નથી. જો કે પાકિસ્તાનમાં આ શબ્દો એના જાસૂસી સંગઠન આઈએસઆઈ વતી સાફસૂફીનું કામ કરનારા-કાયમ માટે અજ્ઞાત રહેતા લોકો માટે બોલવામાં આવે છે.

પાકિસ્તાનમાં કોઈ માણસ એના લશ્કરનાં કુકર્મોની સામે અવાજ ઉઠાવતો હોય એને પહેલાં ચેતવણી આપવામાં આવે. એ પછી પણ એ વ્યક્તિ આર્મી સામે બોલવાનું ચાલુ રાખે અથવા તો એના માટે દોરવામાં આવેલી મર્યાદા ઓળંગે તો એનું કાસળ કાઢી નાખવામાં આવે. પછી એ માણસનું મોત ના માલૂમ અફરાદના નામે ચડાવી દેવામાં આવે. કોણે હત્યા કરી? એવું કોઈ પૂછે તો સરકારી પ્રવક્તાનો જવાબ હોયઃ ના માલૂમ અફરાદ.

-અને પાકિસ્તાનમાં તો આવું અનેક વાર થાય છે એટલે ખાસ કોઈને એ વિશે નવાઈ નથી. જો કે છેલ્લા બારેક મહિના દરમિયાન પાકિસ્તાનમાં આઈએસઆઈના જડસુ મારાઓના નામે જે લોકોનાં મોત ચડ્યાં છે એમનાં નામ જોઈને ચોક્કસ કોઈને પણ નવાઈ લાગે.

બિલાલ મુર્શીદ, અકરમ કાઝી, ખ્વાજા શાહિદ, અદનાન અહેમદ, મૌલાના

રહીમુલ્લાહ તારિક, પરમજિત સિંહ પંજવાર, મુફ્તી કૈઝર ફારુખ... આ યાદી હજી લાંબી છે. આ બધા એ લોકો છે, જેમને ભારતે આતંકવાદી ઘોષિત કર્યા છે, અમુક સામે ઈન્ટરપોલની નોટિસ નીકળી છે, કેટલાકને તો વળી અમેરિકા પણ શોધે છે. જો કે હવે આમાંથી કોઈ હાથ આવે એમ નથી. એનું કારણ એ કે આ બધાનાં ઢીમ ઢળી ચૂક્યાં છે. કોઈને ગોળી ધરબી દેવામાં આવી, કોઈ પર છરા-ચાકાથી જીવલેણ હુમલો થયો તો કોઈનું તો ગળું જ કાપી નાખવામાં આવ્યું. આ તમામ કોઈ ને કોઈ ત્રાસવાદી સંગઠન સાથે સંકળાયેલા હતા, ભારતમાં અનેક આતંકી હુમલામાં એમનો હાથ હતો અને ભારત એમને લાંબા સમયથી શોધતું હતું, પણ એ બધા અત્યાર સુધી પાકિસ્તાનમાં હતા અને સલામત હતા.

તો પછી અચાનક એવું તે શું થયું કે એમાંથી એક પછી એકનો ખાતમો શરૂ થયો?