ગુજરાતમાં ભાજપની રાજહઠ ફાવશે કે ક્ષત્રિયોનો વટ?

છેવટે રાજકોટમાં પુરુષોત્તમ રૂપાલાએ ફૉર્મ ભરી દીધા પછી ગુજરાતની કઈ બેઠક પર ક્ષત્રિયો ભાજપને નડશે એની ચર્ચા જામી છે. એ સામે કોંગ્રેસ માટે સૌથી મોટો પડકાર મેદાન-એ-જંગમાં ટકી રહેવાનો છે.

- કેતન ત્રિવેદી (અમદાવાદ)

જો રૂપાલા વિરુદ્ધ ક્ષત્રિય વિવાદમાં છેલ્લી ઘડીએ કાંઈ નવાજૂની ન થાય તો ૨૦૨૪ની લોકસભાની આ ચૂંટણી ગુજરાતમાં ક્ષત્રિયોના વટ અને શાસકોની હઠ માટે જાણીતી બનશે. મંગળવાર, ૧૬ એપ્રિલની બપોરે આ લખાઈ રહ્યું છે ત્યાં સુધી આંદોલને ચડેલા ક્ષત્રિયો અને ભાજપ વચ્ચે કોઈ સમાધાન થયું નથી અને રાજકોટ બેઠક પરથી ઉમેદવારી ફૉર્મ ભર્યા પછી પુરુષોત્તમ રૂપાલા જ ભાજપના ઉમેદવાર હશે એ સાફ થઈ ચૂક્યું છે.

૧૪ એપ્રિલે રાજકોટમાં વિશાળ સંમેલન દ્વારા ક્ષત્રિયોએ શક્તિપ્રદર્શન કર્યું એ પછી ભાજપ પારોઠનાં પગલાં ભરશે કે કેમ એ મુદ્દે ખાસ્સી ચર્ચા ચાલી, પણ ન તો ભાજપ ટસનો મસ થયો કે ન ક્ષત્રિયો ઝૂકવા તૈયાર થયા. ક્ષત્રિયોના આ શક્તિપ્રદર્શન સામે ફૉર્મ ભરતી વખતે પુરુષોત્તમ રૂપાલાએ પણ પદયાત્રા અને જાહેરસભા થકી સામે શક્તિપ્રદર્શન કર્યું છે. સામસામાં શક્તિપ્રદર્શનો પછી દેખીતી રીતે જ સમાધાનનો રસ્તો સાંકડો થઈ ચૂક્યો છે.

તૃપ્તિમાં રોલ મિતનાં અવાર ક્ષત્રિય આંદોલન સંકલન સમિતિનાં અગ્રણી તૃપ્તિબા રાઓલ ચિત્રલેખા સાથેની વાતચીતમાં આંદોલન ચાલુ જ હોવાનો વિશ્વાસ દર્શાવતાં કહે છેઃ ‘અમે ૧૯મીએ ફૉર્મ પાછું ખેંચવાની મુદત પૂરી થાય ત્યાં સુધી રાહ જોઈશું, નહીં તો એ પછી આગળની રણનીતિ અમલમાં મૂકીશું.’ પરંતુ રૂપાલા જેવા મોટા ગજાના ઉમેદવાર પાસે ફૉર્મ ભરાવીને પાછું ખેંચાવાય તો રૂપાલા અને ભાજપ બન્નેની આબરૂ જાય એ જોતાં એવી શક્યતા નહીંવત્ છે. વળી, રાજકોટના સંમેલન પછી જ આંદોલન સંકલન સમિતિના અગ્રણીઓના વલણને લઈને પદ્મિનીબા વાળાની કથિત ઑડિયો ક્લિપ વાઈરલ થઈ રહી છે, જેમાં આંદોલનકારીઓ અને સમિતિના અગ્રણીઓ વચ્ચેના મતભેદો બહાર આવ્યા છે. જો આ વાત સાચી હોય તો ભાજપ આંદોલનકારીઓમાં તડાં પડાવીને સંભવિત નુકસાન ખાળવાની રણનીતિ અપનાવી શકે છે.

રાજકોટમાં ક્ષત્રિયોએ મસમોટું સંમેલન યોજી એમની તાકાત દેખાડી એના બે જ દિવસમાં પુરુષોત્તમ રૂપાલા વાજતેગાજતે ઉમેદવારીપત્ર ભરવા નીકળ્યા.