સ્રી નેતૃત્વમાં પાછળ પડે છે, કારણ કે..

સંસદમાં મહિલા અનામતની વાત થાય છે, પણ ચૂંટણીમાં પૂરતું પ્રતિનિધિત્વ કેમ મળતું નથી?

- ડૉ. મિતાલી સમોવા

એકવીસમી સદીમાં પણ ઘણા લોકો એવું જ માને છે કે સ્ત્રીમાં વહીવટી ક્ષમતા હોતી નથી. મુશ્કેલી એ છે કે આવું માનવાવાળામાં સ્ત્રીનો પણ સમાવેશ છે! અનેક પરિવારમાં આજે પણ સ્ત્રીને નોકરાણી કે સેકન્ડ સિટિઝનથી વિશેષ ગણવામાં આવતી નથી. ઘરની જ વહુને ઘરના કોઈ નિર્ણયમાં ભાગીદારી આપવામાં નથી આવતી એટલે દેશના વહીવટમાં તો સ્ત્રીને યોગ્ય સ્થાન અને જવાબદારી અપાય એ વિચાર પણ દૂરનો હોય એમ લાગે છે. અલબત્ત, આમાં અપવાદ જરૂર છે.

થોડા સમય પહેલાં મહારાષ્ટ્રનાં સંસદસભ્ય સુપ્રિયા સુળેને એક ટીવી કાર્યક્રમમાં અન્ય પક્ષના એક પુરુષ નેતાએ ઉતારી પાડતાં કહી દીધેલું કે છાનાંમાનાં ઘરે જાઓ અને રસોડું સંભાળો! જાણે કે આખા પરિવારનું પેટ ભરવાનું-રસોઈનું કામ કરવું કોઈ અપમાનજનક નોકરી ન હોય! એક તરફ આપણે ઘરનું, ખાસ તો માતા કે પત્નીના હાથનું ખાવા માટે આગ્રહ રાખીએ છીએ, પરંતુ ખરેખર આરોગ્યપ્રદ રસોઈ બનાવતી અને પરિવારજનો સારું જમી શકે એ માટે ક્યારેક પોતાની કરિયરને દાવ પર લગાવતી સ્ત્રીની આપણે કદર કરતાં નથી એ વાત આવાં મહેણાં-ટોણાથી સાબિત થાય છે.