શોખને કાર્રાર્દી બનાવી સ્વાદિષ્ટ સફળતા મેળવી રે લોલ...

વાડીનારમાં ઊછરેલી આ ગરવી ગુજરાતણે હોંગકોંગની ધરતી પર ભારતીય કળા-સંસ્કૃતિ-ભોજનનું મિશ્રણ રચી કરિયરની એક નવી કેડી કંડારી છે.

- દેવેન્દ્ર જાની

થોડા સમય પહેલાંની વાત, ભારતથી સેંકડો કિલોમીટર આવેલા હોંગકોંગમાં દિવાળીના તહેવારને લગતો એક પરિસંવાદ યોજાયો, જેમાં સ્થાનિક વિદ્યાર્થીઓને પ્રકાશના પર્વના મહત્ત્વથી લઈને ઘરની સફાઈ તથા આંગણામાં રંગોળી કરવી અને ચેવડો, ચોળાફળી, તીખા ગાંઠિયા, ઘૂઘરા, વગેરે બનાવવાની સમજ આપવામાં આવી. સાથે દિવાળીના નાસ્તા-મીઠાઈનો ટેસ્ટ કરાવવામાં આવ્યો. આ બધું જોઈને ચાઈનીસ પ્રભુત્વવાળા દેશના કિશોરો-યુવાનો હરખાઈ ઊઠ્યા.

ભાષાની મુશ્કેલી છતાં આવા નોખા-અનોખા સેમિનારની પરિકલ્પના કરનારી સૌરાષ્ટ્રની ગુજરાતણનું નામઃ પૂર્વી બુટોલા. મૂળ વિજ્ઞાનના વિષય સાથે સ્નાતક થયેલી પૂર્વી માટે સમય-સંજોગ એવા સર્જાયા કે નૃત્ય-સંગીતના શોખને આગળ ધપાવવા વિદેશની ધરતી પર એને વ્યવસાયનું સ્વરૂપ આપ્યું.

પૂર્વીનો જન્મ રાજકોટમાં. પિતા ડી.એમ. ઠક્કર પ્રતિષ્ઠિત ઈન્ડિયન ઑઈલ કંપની (આઈઓસી)માં મહત્ત્વના પદ પર બિરાજે. પિતાની બદલી થતાં પૂર્વી પરિવાર સાથે જામનગર નજીક આવેલા વાડીનારની આઈઓસી કૉલોનીમાં રહેવા આવ્યાં. અહીં પ્રાથમિક શિક્ષણ બાદ જામનગરની ડી.કે.વી. કૉલેજમાં સાયન્સ ગ્રેજ્યુએટ થયાં. પરિવારની ઈચ્છા હતી કે દીકરી મેડિકલ કે એન્જિનિયરિંગ ક્ષેત્રે જાય, પરંતુ એને તો ગરબા-નૃત્ય અને શાસ્ત્રીય સંગીતમાં રસ. શાળામાં અભ્યાસની સાથે સાથે સ્ટેજ પ્રોગ્રામમાં ભાગ લેતાં. વળી, ફૅશન ડિઝાઈનિંગનો કોર્સ પણ કર્યો.