લોકોને ચુસ્તી-સ્ફૂર્તિનું દાન આપે છે આ મહિલા!

એમનું ધ્યેય એક જ છે, ગમે તે રીતે લોકોને વ્યાયામ કરતાં કરવા. વર્ષોથી મુંબઈના જુહૂ બીચ પર ફિટનેસના વિનામૂલ્ય વર્ગો લેતાં આ મહિલાની લગનીને ખરેખર બિરદાવવા જેવી છે.

- સમીર પાલેજા

મુંબઈના જુહૂ બીચ પર વહેલી સવારે ટહેલવા જાઓ તો ૨૦૦થી ૩૦૦ લોકો સંગીતના તાલે ઝૂમી રહ્યા હોવાનું જરૂર જોવા મળે. સીઝન મુજબ લોકોની સંખ્યામાં વધ-ઘટ થાય, પણ આ કાર્યક્રમ ક્યારેય બંધ ન રહે. વાત થઈ રહી છે એવા ફિટનેસ વર્ગની, જે વર્ષના ૩૬૫ દિવસ કાર્યરત વય રહે છે. એમાં દાખલ થવા માટે કોઈ પ્રવેશ ફી કે રજિસ્ટ્રેશનની જરૂર નથી. બસ, આવો ને કરો ઍરોબિક્સ. ત્યાર પછી પ્રાણાયામ અને યોગિક ક્રિયા કરીને પ્રફુલ્લિત મને ઘરે જાઓ.

થોડાં વર્ષ અગાઉ આ અનોખી વ્યાયામશાળા લોકપ્રિય ટીવીસિરિયલ તારક મેહતા કા ઉલ્ટા ચશ્મામાં પણ ચમકી હતી. નિર્માતા આસિતકુમાર મોદી તો વ્યક્તિગત રીતે આ ફિટનેસ ક્લાસમાં સહભાગી પણ થતા. આજે જુહૂ વિસ્તારના અનેક ઉદ્યોગપતિ, બિઝનેસમેન, સ્થાનિક રાજકારણીથી લઈને ગૃહિણી, વિદ્યાર્થી અને ઝૂંપડપટ્ટીના લોકો સુદ્ધાં અહીં સંગીતના તાલે ઍરોબિક્સ કરતાં દેખાય છે.

છેલ્લાં સાતેક વર્ષથી ચાલતી આ વિનામૂલ્ય ઓપન ઍર ફિટનેસ શિબિરનાં સંચાલિકા છે ૬૨ વર્ષનાં ઉષા પટેલ, જેમણે સેંકડો લોકોને ઍરોબિક્સ અને યોગ કરવા તરફ વાળ્યા છે. ઉષાબહેન ગર્વથી પ્રિયદર્શિનીને કહે છે કે નિયમિત વ્યાયામ અને પ્રાણાયામ-યોગથી ફેફસાંની કાર્યક્ષમતા એ હદે વધી કે અમારા ગ્રુપમાંથી કોઈને જ કોવિડ ન થયો, કોવિડથી મૃત્યુનો તો સવાલ જ નહોતો.

વહેલી સવારે છ વાગ્યે ઉષા પટેલ કે એમના કોઈ સહયોગી આ વર્ગ શરૂ કરાવી દે. એક તરફ, સ્પીકરમાં ગીત-સંગીત વાગવા માંડે તો બીજી તરફ, નાનકડા મંચ પર ઊભા રહીને સંચાલક માઈકમાં શારીરિક ક્રિયા અંગે કમાન્ડ આપવા માંડે.