બાળક તરીકે આપણે કેવાં છીએ?

સંયુક્ત કુટુંબવ્યવસ્થા જેની ઓળખ છે એવા આપણા દેશમાં વડીલોની હાલત પણ જાણી લો.

- ડૉ. મિતાલી સમોવા

આપણે ભારતીયો આપણી સંયુક્ત કુટુંબવ્યવસ્થા અને વડીલો પ્રત્યેની સેવાશુશ્રૂષાના વારસાની સંસ્કૃતિ માટે ખૂબ ગર્વની લાગણી અનુભવીએ છીએ. કબૂલ, પણ શું બધા પરિવારોમાં આ હકીકત છે ખરી? જો આપણે ખરેખર આજ્ઞાકારી બાળકો છીએ તો પછી ધાર્મિક યાત્રાધામોમાં, વૃદ્ધાશ્રમોમાં કે આશ્રયગૃહોમાં કે કોનાં હજારો માતા-પિતા લાગણીની રાહમાં ઝૂરતાં ઝૂરતાં મૃત્યુ પામે છે?

આજકાલ લગ્ન માટે યુવકના ઘરની માહિતી તપાસતાં યુવતી દ્વારા નફ્ફટ રીતે પૂછવામાં આવતો એક પ્રશ્ન છેઃ ઘરમાં ડસ્ટબિન કેટલાં છે? અહીં ડસ્ટબિન એટલે ઘરમાં વડીલો કેટલા છે એવો સ્પષ્ટ નિર્દેશ! વડીલો, જેમનું એ યુવતીએ પરણીને આવ્યા બાદ કદાચ ધ્યાન રાખવાનું થઈ શકે અને પોતે ઘરમાં સૅટલ થાય એ પછી જેમનો કદાચ કચરાની જેમ નિકાલ કરી શકાય! આવી યુવતીઓને પૂછવાનું કે તમારાં પોતાનાં માતા-પિતા વૃદ્ધ બન્યા પછી એમનો પણ તમે ડસ્ટબિન તરીકે જ ઉલ્લેખ કરશો?