મહત્તા સમજાય છે, ગંભીરતા નહીં...

કરશે નહીં જો માનવ, પર્યાવરણની રક્ષા ગૂગલમાં જોવા મળશે જંગલ, નદી ને ઝરણાં. – અંકિતા મારુ ‘જીનલ’

- હિતેન આનંદપરા

કુદરતમાં આવરણનો મહિમા પણ છે અને આવશ્યકતા પણ છે. ધરતી પર હરિયાળું આવરણ હોય તો એ વધારે સુંદર લાગે. રેતીનું આવરણ ભલે ભયંકર લાગે, છતાં એ રણને સૌંદર્ય બક્ષે છે. આપણું શરીર પંચમહાભૂતનું બનેલું છે. એને ત્વચાનું આવરણ આપીને કુદરતે સંરક્ષણ પણ આપ્યું છે. પૃથ્વી માટેનું આવું સંરક્ષણકવચ પર્યાવરણ છે. વિશ્વ પર્યાવરણ દિવસ નિમિત્તે થતું ચિંતન માત્ર મહત્ત્વનું જ નહીં, માર્મિક પણ બની ગયું છે.

ઉદય-અસ્ત, સર્જન-વિસર્જનનો નિયમ કુદરતમાં ચાલ્યા કરે છે. પ્રત્યેક જીવ પોતાની પ્રજાતિ ટકાવવા વાતાવરણને અનુકૂળ ફેરફાર કરવાનું શીખતો જાય છે. જો એ એમ ન કરે તો એનું નિકંદન નીકળી જાય. માણસજાતે આ વાતની મહત્તા સમજી લીધી છે, પણ ગંભીરતા સમજવાની બાકી છે.