આ જરા વધારે પડતું થઈ ગયું?

હું તને ક્રિકેટ શીખવું, તું મને ઈતિહાસ શીખવશે? તું જાહ્નવી કપૂર-રાજકુમાર રાવ 'મિસ્ટર ઍન્ડ મિસેસ માહી'માં.

- રઘુ જેટલી

બોલો, હજી તો માંડ આઈપીએલ પૂરી થઈ ત્યાં પાછો માહી?

ના ના... આને ને રાંચીના પેલા માહી માર રહા હૈવાળા માહીને ખાસ કાંઈ લેવાદેવા નથી. વસ્તુ એવી છે કે આ શુક્રવારે (૩૧ મેએ) ડિરેક્ટર શરન શર્માની મિસ્ટર ઍન્ડ મિસેસ માહી નામની ફિલ્મ રિલીઝ થઈ રહી છે. અને જલસાઘરના બાશિંદા તો જાણે જ છે કે ભારતીય ક્રિકેટ ટીમનો ને આઈપીએલની ચેન્નઈ સુપર કિંગ્સ ટીમનો પૂર્વ કપ્તાન મહેન્દ્રસિંહ ધોની માહીના હુલામણા નામે ઓળખાય છે.

ફિલ્મની વાર્તા કંઈ આવી છે: મહેન્દ્ર (રાજકુમાર રાવ) અને મહિમા (જાહ્નવી કપૂર) અરેજ્ડ મૅરેજથી જોડાય છે. મૅરેજ પછી બન્નેને ખબર પડે છે કે એમનો એક શોખ કૉમન છે. એ છે ક્રિકેટ. મહેન્દ્ર તો સ્થાનિક કક્ષાએ ક્રિકેટર પણ રહી ચૂકેલો, પણ એમાં એ ખાસ કંઈ ઉકાળી શક્યો નહોતો. લગ્ન બાદ એને જ્યારે ખબર પડે છે કે અર્ધાંગિનીમાં તો ક્રિકેટની ટેલેન્ટ ભરપૂર છે એટલે એ મહિમાને પ્રોફેશનલ ક્રિકેટર બનાવવા એનું કોચિંગ શરૂ કરે છે.