ડૉક્ટર સાહેબ, જરા જાત માટે પણ સમય કાઢો...

બીજાનાં જીવન બચાવવા સતત મથતા રહેતા ડૉક્ટરને રિલેક્સ થવાનો ટાઈમ ભાગ્યે જ મળે. એક તો વિદ્યાર્થીજીવન દરમિયાન એમણે ઘણું સ્ટ્રેસ ભોગવ્યું હોય અને કામે લાગ્યા પછી તો રોજ નવા પડકાર ઝીલવાના થાય. એક જુલાઈએ ડૉક્ટર્સ ડે છે એ નિમિત્તે ‘ચિત્રલેખા’એ ગુજરાત-મુંબઈના કેટલાક નામાંકિત તબીબો સાથે વાત કરીને એ એમની વ્યવસાયી પ્રવૃત્તિનો ભાર હળવો કરવા કહો કે થાક ઉતારવા-રિલેક્સ થવા માટે કેવું પ્લાનિંગ કરે છે તથા એનાં શું પરિણામ મળ્યાં એ પૂછ્યું. સાથે એમના અમુક શોખ વિશે પણ અવનવી વાતો જાણવા મળી.

- મહેશ શાહ (અમદાવાદ) । સમીર પાલેજા (મુંબઈ) દેવેન્દ્ર જાની (રાજકોટ) । અરવિંદ ગોંડલિયા (સુરત)

અનુશાસન, વ્યાયામ અને સાત્ત્વિક આહાર ડૉ. દિનેશ પટેલ અમદાવાદ

સવારથી સાંજ સુધી પેશન્ટ કન્સલ્ટેશન. એની વચ્ચે બે-ત્રણ સર્જરી પણ ખરી. સાંજે દરદીના રૂમમાં વિઝિટ સિવાય દિવસ પૂરો થાય નહીં. આ બધાની સાથે વચ્ચે વચ્ચે ફોન પણ અટેન્ડ કરવાના. લંચ પણ જેમ-તેમ હૉસ્પિટલમાં જ લેવું પડે...

આ દિનચર્યા છે અમદાવાદના એક જાણીતા ડૉક્ટરની. એમની જેમ ઘણા તબીબો આખો દહાડો ક્લિનિક કે હૉસ્પિટલમાં વ્યસ્ત રહેતા હશે. જો કે અમુક ડૉક્ટર આવી વ્યવસાયી વ્યસ્તતા વચ્ચે પણ સમયનું ઝીણવટપૂર્વકનું આયોજન કરીને પોતાના અને પરિવાર માટે નવરાશ મેળવી લેતા હોય છે. મૅનેજમેન્ટની ભાષામાં કહીએ તો પ્રોફેશનલ (વર્ક) લાઈફ સાથે પર્સનલ લાઈફનું બૅલેન્સ અત્યંત જરૂરી છે. આવું સંતુલન જળવાય તો કામનો ભાર કે ઉચાટ ન લાગે અને મનપસંદ પ્રવૃત્તિનો આનંદ પણ મેળવી શકાય. એ થકી સ્વસ્થતા જળવાય એ મોટો લાભ.

અમદાવાદની દેવસ્ય કિડની અને મલ્ટિ સુપર સ્પેશિયાલિટી હૉસ્પિટલના સંસ્થાપક-ચૅરમૅન, જાણીતા યુરોલૉજિસ્ટ અને એન્ડ્રોલૉજિસ્ટ ડૉ. દિનેશ પટેલ ત્રણ દાયકાથી પ્રેક્ટિસ કરે છે. એમણે એમબીબીએસ, એમએસ, એમસીએચ (યુરોલૉજી)ના અભ્યાસ બાદ ૧૯૮૪માં અમદાવાદના વાડજમાં દેવસ્ય કિડની હૉસ્પિટલ શરૂ કરી.

સમય જતાં અત્યાધુનિક અને વિશ્વસ્તરીય દેવસ્ય મલ્ટિ સુપર સ્પેશિયાલિટી હૉસ્પિટલની અમદાવાદમાં ત્રણ અને ગાંધીનગરમાં એક એમ ચાર શાખા પણ શરૂ થઈ.

ત્રણ દાયકામાં કિડની અને મૂત્રમાર્ગને લગતા રોગોનાં એક લાખથી વધુ ઑપરેશન્સ એમણે લેપ્રોસ્કોપી, લેસર અને એન્ડોસ્કોપિક ટેક્નોલૉજીથી સફળતાપૂર્વક કર્યાં. એમાં વિદેશી દરદીઓ પણ ખરા. દેવસ્થમાં ત્રણ ઈન્ટરનૅશનલ કૉન્ફરન્સ યોજાઈ તથા પચ્ચીસ વિદેશી તબીબે કિડની અને પથરીના રોગોની સારવાર, લેપ્રોસ્કોપી, વગેરેની તાલીમ લીધી.