સ્ત્રીની ઈચ્છા કે જરૂરત પણ ન સમજીવી જોઈએ?

હિસ્ટિરિયાની બીમારીના બંધનમાં બાંધી દઈ મહિલાની મરજીને દબાવી દેવાનું ઉચિત નથી.

- ડૉ. મિતાલી સમોવા

હિસ્ટિરિયા નામની વ્યાધિ, ગર્ભાશય, ભૂત વળગીને કે માતા આવીને ધૂણવાનું, બાવા-ભૂરાડીઓ અને મેડિકલ સાયન્સને શું લાગે-વળગે વળી? અને આ બધાંને સ્ત્રીની જાતીયતા સાથે શું? સ્ટેજ પર હાલેલુયા કરવું કે રૉક કૉન્સર્ટ કે જુલૂસમાં ભીડ વચ્ચે નાચવું ને ઓશો રજનીશના સંભોગથી સમાધિના આઈડિયા વચ્ચે શું સામ્યતા?

આ તે કેવો ‘રોગ’ અને કેવી ‘સારવાર’?

સ્ત્રીની જાતીયતાને પિતૃસત્તાક વ્યવસ્થામાં હંમેશાં દબાવવામાં આવી છે. ત્યાં સુધી કે દામ્પત્ય જેવા અધિકારિક સંબંધમાં પણ સ્ત્રીને પતિ પાસેથી પોતાની જાતીય જરૂરત સંતોષવાની માગણી કરવાનો અધિકાર નહોતો, હજી ઘણે અંશે નથી. આજે પણ પોતાની જાતીય જરૂરત વિશે સભાન સ્ત્રીને સંસ્કારી ગણવામાં આવતી નથી.

આજથી ૫૦૦-૭૦૦ વર્ષ પહેલાં યુરોપ-અમેરિકામાં છોકરીઓ મહિલાઓમાં એક બીમારી જબરદસ્ત રોગચાળાની જેમ ફેલાઈ રહી હતી. ત્યાં દર ચોથી-પાંચમી સ્ત્રી હિસ્ટિરિયાની રોગી મનાતી હતી. હિસ્ટિરિયાને આજે આપણે એક માનસિક-ચેતાતંત્રનો રોગ સમજીએ છીએ, જે સ્ત્રીઓ-પુરુષો બન્નેને થઈ શકે છે, પરંતુ ભૂતકાળમાં એનો અર્થ અલગ હતો.